კოლოსალური უპირატესობით - დვალიშვილმა პიოტრ იანი დაამარცხა

ლას ვეგასში UFC Fight Night ღონისძიება გაიმართა. ქართველი გულშემატკივრები ამ დღეს დიდ ხანს ელოდნენ, რადგან Main Card-ზე მონაწილეობას მერაბ დვალიშვილი იღებდა. ქართველი მებრძოლი პიოტრ იანს დაუპირისპირდა და მძიმე ბრძოლაში დაამარცხა.

პირველმა რაუნდმა მერაბის უპირატესობით ჩაიარა. უფრო მეტად „ჩვენებური“ აქტიურობდა და რაუნდის დასრულების შემდეგ მის სახეზე ღიმილი გამოისახა. შესვენების შემდეგ, კვლავ დვალიშვილი აქტიურობდა. პიოტრი ფეხებში შესვლას ცდილობდა, მაგრამ არაფერი გამოსდიოდა. პირიქით, ფეხით უპირატესობა აშკარად მერაბის მხარეს იყო.

ერთ მომენტში ქართველი მებრძოლი დაეცა, თუმცა რუსს უპირატესობის მოპოვების საშუალება არ მისცა და პირიქით, შეტევაზე თვითონ გადავიდა. მეორე რაუნდი მთლიანად მერაბის უპირატესობით წარიმართა.

მესამე რაუნდში უპირატესობის მოპოვებას ორივე მებრძოლი ცდილობდა, მაგრამ უკეთესი დვალიშვილი იყო. იანს აშკარად დაღლა დაეტყო. მერაბს უპირატესობა „თეიქ დაუნებშიც“ ჰქონდა.

მეოთხე რაუნდში პიოტრ იანს ის ყველაფერი სახეზე ეტყობოდა, რასაც დვალიშვილი მთელი დაპირისპირების განმავლობაში უკეთებდა. ყველასთვის ნათელი გახდა, რომ გამარჯვების შანსი უფრო მეტად მერაბს ჰქონდა. გადამწყვეტ მეხუთე რაუნდში სიტუაცია არ შეცვლილა და ყველაფერმა ქართველის უპირატესობით ჩაიარა. საბოლოოდ, რა თქმა უნდა, მსაჯებმა გამარჯვებულად მერაბ დვალიშვილი გამოაცხადეს.