„კვარადონა ნამდვილი აღმოჩენაა“ - უეფას ვიცე-პრეზიდენტი

უეფას ვიცე-პრეზიდენტმა, ზიბი ბონიეკმა რადიო/ტელევიზია Vikons-ის ეთერში „ნაპოლის“ შესახებ ისაუბრა და „პარტენოპეის“ მისამართით ლამაზი სიტყვები არ დაიშურა.

ბონიეკმა ზაფხულის სატრანსფერო ფანჯარაზე გუნდის სპორტული დირექტორის, კრისტიანო ჯუნტოლის მიერ გაწეული სამუშაოც მოიწონა.

რას ამბობს ზიბი ბონიეკი:

გასულ ზაფხულს ვერავინ გააცნობიერა, თუ როგორი დიდი სამუშაო გასწია ჯუნტოლიმ. „ნაპოლიმ“ ორი არაჩვეულებრივი მოთამაშე დაიმატა, კიმი და კვარადონა, მაგრამ დღეს, ზოგადად მთელმა გუნდმა შეიცვალა თამაშებისადმი დამოკიდებულება. ჯუნტოლიმ ნამდვილად ძლიერი მოთამაშეები დაიმატა, თუმცა ზოგადად გუნდი გამოიყურება ძალიან კარგად. სპალეტი კარგად მიხვდა ლობოტკას როლს. ეს არის მოთამაშე, რომელიც ტანით პატარაა, მაგრამ ტაქტიკური მნიშვნელობით, ის ორი მეტრის სიმაღლისაა.

შემდეგ მოდიან კვარა, ჟიელინსკი, პოლიტანო... და იმ შემთხვევაში, თუ ოსიმენი ვერ თამაშობს, სპალეტის აქვს მრავალფეროვანი არჩევანი სიმეონესა და რასპადორის სახით. ვერაფერს იტყვი, „ნაპოლი“ იმსახურებს სკუდეტოს მოგებას. გათამაშებაში არ არსებობს გუნდი, რომელიც ამხელა სხვაობის აღმოფხვრას შეძლებს. „ნაპოლი“ არის დემონსტრირება იმის, თუ როგორ შეიძლება იყო ძლიერი გუნდი დიდი ფინანსების დახარჯვის გარეშე. ფეხბურთელებს შორის აშკარად ძლიერი ჰარმონიაა და სკუდეტოს მოგების გიჟური სურვილი იგრძნობა.

შეგახსენებთ, რომ „ნაპოლი“ იტალიის სერია A-ს სატურნირო ცხრილში 56 ქულით პირველ ადგილზე იმყოფება და უახლოეს მდევარ „ინტერს“ 13 ქულით უსწრებს.

ლუჩანო სპალეტის გუნდმა ბოლო მატჩი 5 თებერვალს, სტუმრად „სპეციას“ წინააღმდეგ გამართა, მომდევნო შეხვედრა კი 12 თებერვალს, საკუთარ მოედანზე ლუკა ლოჩოშვილის „კრემონეზეს“ წინააღმდეგ ელის. მატჩი საქართველოს დროით 23:45 საათზე დაიწყება.