გალტიე: მესის ბურთი უფრო ხშირად უნდა მივცეთ, სხვებმა მის ნაცვლად უნდა იმუშაონ

პსჟ-ს მთავარმა მწვრთნელმა კრისტოფ გალტიემ „ტულუზასთან“ (2:1) ლიონელ მესის გოლზე და მის თამაშზე ისაუბრა.

„მესის წყალობით, გუნდი ერთიანი რჩება. რამდენიმე ფეხბურთელი გვაკლია, არა მარტო მბაპე და ნეიმარი, არამედ ვერატი, რამოსი...

ლიონელმა ლიდერის როლი აიღო, ეს ბუნებრივია. ის ჩვენი თამასისთვის ძალიან მნიშვნელოვანია და ხშირად ლიდერობს, ჩვენი მთავარი რგოლია. მას ბურთი უფრო ხშირად უნდა მივცეთ.

მესი გუნდის მამოძრავებელი ძალა იყო, გოლები გაიტანა და მომენტები შექმნა. გუნდს ვთხოვ ლეოსთვის ითამაშონ, მისთვის იმუშაონ.

ჩვენ უნდა გავათავისუფლოთ იგი გარკვეული საქმისგან, მისმა პარტნიორებმა კი ორმაგი ძალისხმევა უნდა გამოიჩინონ ბურთის დასაბრუნებლად და აქტიურად იმოძრაონ, რათა მან დღევანდელ ფეხბურთში ასეთი იშვიათი დონის პასების გაკეთება შეძლოს“,

- განაცხადა გალტიემ.

შეგახსენებთ, რომ მესის „ტულუზასთან“ გატანილი გოლის შემდეგ, მიმდინარე სეზონში პსჟ-ს მაისურით ყველა ტურნირზე 23 მატჩში 14 გოლი და 14 საგოლე გადაცემა აქვს.