დიდი შანსი დვალიშვილს! - ალჯომ წონის ცვლილება დააანონსა

UFC-ში, სუპერმსუბუქი კატეგორიის მოქმედმა ჩემპიონმა და მერაბ დვალიშვილის ახლო მეგობარმა, ალჯამეინ სტერლინგმა The Schmo-სთან ინტერვიუში თავის სამომავლო გეგმებზე ისაუბრა და განაცხადა, რომ მისი მომავალი მეტოქე 110%-ით ჰენრი სეჰუდო იქნება.

იამაიკელი მებრძოლი ორთაბრძოლის გამართვის სავარაუდო თარიღსაც ასახელებს.

რას ამბობს ალჯო:

ჰენრი სეჰუდო 110%-ით შემდეგი მეტოქე იქნება, თუმცა ეს ბრძოლა აპრილში არ შედგება. ჩემს სამედიცინო შტაბთან და ექიმებთან კონსულტაციების შემდეგ გადავწყვიტე, რომ გამოჯანმრთელებას ცოტა მეტი დრო დავუთმოთ და ამის გამო ეს ბრძოლა დიდი ალბათობით მაისში ჩატარდება.

ალჯომ ცოტა ხნის წინ, სპარინგის დროს ბიცეფსის ტრავმა მიიღო, რამაც მისი გეგმები ცოტა შეაფერხა. ამის გამო იამაიკელი მებრძოლი კოლუმბიაში მიემგზავრება, რათა ღეროვანი უჯრედების თერაპია ჩაიტაროს და როგორც თვითონ ამბობს, ჩხუბისთვის 100%-ით მზად აპრილის ბოლოს იქნება:

ვფიქრობ, ამ მეთოდით მკურნალობა ყველაზე კარგი იქნება. ამაში ოპტიმისტურად ვარ განწყობილი და დარწმუნებული ვარ ეს ფორმის 100%-მდე დამაბრუნებს. შემდეგ კი მზად ვიქნები ისეთი რთული მეტოქესთან დაპირისპირებისთვის, როგორიც სეჰუდოა. მას უნდა შევახსენო, რომ პენსიაზე უნდა დარჩენილიყო.

მგონია, რომ ბრძოლას მეორე რაუნდში, ნოკ აუტით დავასრულებ და როდესაც სეჰუდოს დავაფინიშებ, ამ დივიზიონში ეს ჩემთვის მაქსიმუმი იქნება. არ ვფიქრობ, რომ ამ წონაში ჩემთვის კიდევ რამე იყოს დარჩენილი.

ამის შემდეგ ჟურნალისტმა მას შონ ო’მალისთან შესაძლო დაპირისპირებაზე ჰკითხა, რაზეც ალჯომ ასე უპასუხა:

შესაძლოა ამ ბრძოლამ მაინც მაცდუნოს, ან მაინც ავიდე ზედა წონაში, სუპერმსუბუქი წონის დივიზიონის მეფობას და დატერორებას კი მერაბი გააგრძელებს.

ალჯამეინ სტერლინგის დღევანდელი განცხადებით თუ ვიმსჯელებთ, მერაბ დვალიშვილს დივიზიონის ჩემპიონობამდე დიდი დრო აღარ დარჩენია. მანამდე, მთავარია ქართველმა „მანქანამ“ 11 მარტს რუსი პიოტრ იანი დაამარცხოს, რაც ჩემპიონობისკენ მიმავალ გზაზე ერთ-ერთი გადამწყვეტი ფაქტორი იქნება.

რაც შეეხება ალჯოს, იამაიკელ მებრძოლს შეუძლია ტიტული ზედიზედ მესამედ დაიცვას, რაც UFC-ის ისტორიაში საუკეთესო შედეგი იქნება. სტერლინგმა საჩემპიონო ორთაბრძოლაში ზედიზედ ორჯერ პიოტრ იანი დაამარცხა, ბოლოს კი თი ჯეი დილაშოს მოუგო.