საქართველოს 18-წლამდე ნაკრები 1/4-ფინალშია - ჯგუფის ბოლო მატჩში უნგრეთმა იმარჯვა

საქართველოს 18-წლამდე კალათბურთელთა ნაკრები ევროპის ჩემპიონატის B დივიზიონის ჯგუფური ეტაპის დასკვნით შეხვედრაში უნგრეთის 18-წლამდე ნაკრებს დაუპირისპირდა და დაძაბულ ბრძოლაში 62:68 დამარცხდა.

შეხვედრამდე ორივე გუნდს სამ-სამი გამარჯვება ჰქონდა და ჯგუფის ლიდერის ვინაობაც სწორედ ამ მატჩში უნდა გარკვეულიყო. გამარჯვების შემდეგ პირველი ადგილი უნგრეთმა დაიკავა, თუმცა საქართველოს ნაკრებმა პლეი-ოფის საგზური მაინც მოიპოვა.

პირველი ნახევარი უნგრელთა უპირატესობით წარიმართა. ქართველებს შეტევაში უჭირდათ, რის გამოც მეტოქემ დიდი შესვენებისთვის 12-ქულიანი უპირატესობა მოიპოვა – 38:26.

მეორე ტაიმში ანატოლი ბოისას გაწვრთნილმა გუნდმა თამაშის სურათი შეცვალა. საქართველოს ნაკრებმა დაცვაში საიმედოდ ითამაშა, სხვაობა თანდათან შეამცირა და მესამე პერიოდის მიწურულს დავით ფაჩულიას ზედიზედ ორი ზუსტი სამქულიანის შემდეგ ანგარიშშიც დაწინაურდა.

გადამწყვეტი მეოთხე პერიოდი თანაბარ ბრძოლაში წარიმართა, თუმცა მატჩის ბოლო წუთებზე უფრო ზუსტად უნგრელმა კალათბურთელებმა ითამაშეს და საბოლოოდ 68:62 გაიმარჯვეს.

საქართველოს ნაკრების შემადგენლობაში ყველაზე შედეგიანი დავით ფაჩულია იყო, რომელმაც 17 ქულა და 10 მოხსნა დააგროვა. მათე ხატიაშვილმა შეხვედრა 12 ქულითა და 6 შედეგიანი გადაცემით დაასრულა, ხოლო მათე ყავლაშვილმა 11 ქულა მიითვალა.

მიუხედავად მარცხისა, საქართველოს ნაკრები მეოთხედფინალში გავიდა, სადაც C ჯგუფის გამარჯვებულს, ნიდერლანდების 18-წლამდე ნაკრებს დაუპირისპირდება. მეოთხედფინალური შეხვედრა 31 ივლისს გაიმართება, სადაც ქართველი კალათბურთელები ნახევარფინალის საგზურის მოპოვებას შეეცდებიან.