ორი რამ მაქვს სათქმელი | მარტინესი პორტუგალიის ნაკრებს აღარ გაწვრთნის

2026 წლის მსოფლიოს ჩემპიონატის მერვედფინალში ესპანეთის ნაკრებმა მიკელ მერინოს გამარჯვების გოლით პორტუგალია დაამარცხა და მეოთხედფინალში გავიდა. პორტუგალიის ნაკრებს რობერტო მარტინესი აღარ გაწვრთნის, ამ თემაზე მან ვრცელი განცხადება გააკეთა.

„სიმართლეა, რომ ეს პორტუგალიის ეროვნულ ნაკრებში ჩემი ბოლო მატჩი იყო, მაგრამ ორი რამ მაქვს სათქმელი:

უპირველესად, მინდა მადლობა გადავუხადო პორტუგალიელ ხალხს, რადგან ეს იყო წარმოუდგენელი მოგზაურობა — პატივი, რომელსაც სიტყვებით უბრალოდ ვერ გადმოვცემ. გულშემატკივრებისა და მთელი ქვეყნის ვნება და ენერგია... მადლობა ამ ყველაფრისთვის. ამ მოგონებებს მთელი ცხოვრების განმავლობაში თან ვატარებ.

მეორეც, მინდა მადლობა გადავუხადო ფეხბურთელებს, რადგან ისინი საოცარნი იყვნენ. გუნდში უზარმაზარი ნიჭია, მაგრამ უპირველეს ყოვლისა, იყო დიდი მონდომება, რომ გუნდად ჩამოვყალიბებულიყავით. ეროვნულ ნაკრებში დიდებული მოთამაშეების ყოლა მარტივია, ისინი ხომ საუკეთესოები არიან, მაგრამ ის, რაც ნამდვილად მნიშვნელოვანია, გუნდის აშენებაა.

ჩავატარეთ 45 მატჩი და პორტუგალიის ისტორიაში საუკეთესო მაჩვენებელი დავაფიქსირეთ. ეს ფეხბურთელების თავდადების წყალობით გახდა შესაძლებელი. მივდივარ დაუვიწყარი მოგონებებით: ერთა ლიგის მოგება, რეკორდების დამყარება...

ასევე, მინდა უღრმესი მადლობა გადავუხადო ფედერაციას გაწეული მხარდაჭერისთვის და სამწვრთნელო შტაბს, რომელმაც პირველივე დღიდან პროფესიონალიზმის დაუჯერებელი დონე აჩვენა. ფეხბურთელების დასახმარებლად დაუღალავად ვშრომობდით. მივდივარ დაუვიწყარი მოგონებებით და პორტუგალიელი ხალხის მიმართ ყველაზე გულწრფელი მადლიერებით.“