UFC Freedom 250-ზე ბონუსების სარეკორდო მაჩვენებელს ვიხილავთ

UFC სარეკორდო ბონუსებს გადაიხდის სადღესასწაულო ტურნირის შედეგების მიხედვით, რომელიც ამ უქმეებზე თეთრი სახლის სამხრეთ გაზონზე გაიმართება.

ამის შესახებ ვაშინგტონში გამართულ პრესკონფერენციაზე UFC-ის ხელმძღვანელმა, დენა უაითმა განაცხადა.

„ორი მებრძოლი, რომლებიც „საღამოს ბრძოლის“ მონაწილეები გახდებიან, თითოეული 400 000 დოლარს გამოიმუშავებს. ხოლო „საღამოს გამოსვლისთვის“ ორი ბონუსის მფლობელი 425 000 დოლარს მიიღებს. ვულოცავ ყველას და წარმატებებს გისურვებთ“,

- გამოაცხადა ორგანიზაციის პრეზიდენტმა.

ბონუსების სიდიდის წინა რეკორდი საიუბილეო ტურნირს, UFC 300-ს ეკუთვნოდა, როდესაც პრემიების ოდენობა 300 000 დოლარამდე გაიზარდა, მაგრამ ჩეკების მფლობელი მხოლოდ სამი მებრძოლი გახდა, რადგან მაქს ჰოლოუეი „საღამოს ბრძოლის“ მონაწილეც გახდა და „საღამოს გამოსვლაც“ აჩვენა, რითაც თავისი ჰონორარი 600 000 დოლარით გაზარდა.

მიმდინარე წელს Paramount-თან UFC-ის ახალი სატელევიზიო შეთანხმების ამოქმედების შემდეგ, ორგანიზაციამ მატჩისშემდგომი ბონუსები 50 000-დან 100 000 დოლარამდე გაზარდა, ასევე შემოიღო დამატებითი ბონუსები 25 000 დოლარის ოდენობით ვადამდელი გამარჯვებებისთვის. ლიგის ხელმძღვანელს არ დაუკონკრეტებია, გაიზრდება თუ არა ბონუსები სადღესასწაულო ღონისძიების იმ მონაწილეებისთვის, რომლებიც თავიანთი მეტოქეების დაფინიშებას შეძლებენ.

აშშ-ის დამოუკიდებლობის 250 წლისთავისადმი მიძღვნილი სადღესასწაულო ღონისძიება 14 ივნისს გაიმართება, მისი მთავარი მოვლენები კი მსუბუქ და მძიმე წონებში სატიტულო დაპირისპირებები იქნება.