ჰაიდენჰაიმმა კიოლნსაც მოუგო - ბუდუს გუნდი სასწაულთან ახლოსაა

გერმანიის ბუნდესლიგისს 33-ე ტურში ბუდუ ზივზივაძის „ჰაიდენჰაიმი“ სტუმრად „კიოლნს“ დაუპირისპირდა და 3:1 დაამარცხა.

ბუდუ ზივზივაძე სასტარტო შემადგენლობაში იყო და მოედანზე 84 წუთი გაატარა. ქართველ შემტევს შედეგიანი მოქმედება არ ჰქონია, თუმცა პროდუქტიული მატჩი ჩაატარა და მაღალი შეფასებაც დაიმსახურა.

ბუდუს სტატისტიკა ასეთი იყო - ბურთთან 24 შეხება, 13-დან 9 ზუსტი პასი, 1 დარტყმა, რომელიც დაიბლოკა, 4-დან 2 მოგებული ორთაბრძოლა, 2-დან 1 მოგებული საჰაერო ორთაბრძოლა, 1 ართმევა, 1 დაბლოკილი დარტყმა, 1 მიღებული ყვითელი ბარათი. Sofascore-ს შეფასება - 6.6 ქულა.

ერთი შეხედვით, მეორე ბუნდესლიგაში დასაქვეითებლად განწირულმა „ჰაიდენჰაიმმა“ ფაქტობრივად შეუძლებელი შეძლო და მიმდინარე სეზონის დასრულებამდე ერთი ტურით ადრე პლეი-ოფის ზონაში მოხვედრის რეალური შანსი აქვს. 31 ტურის შემდეგ „ჰაიდენჰაიმი“ 26 ქულით მე-17 პოზიციაზე იმყოფება. ამდენივე ქულა აქვთ პლეი-ოფის ზონაში, მე-16 ადგილზე მყოფ „ვოლფსბურგსა“ და ბოლო, მე-18 პოზიციაზე მყოფ „სანქტ-პაულის“. ბოლო ტურში „სანქტ-პაული“ და „ვოლსფბურგი“ ერთმანეთს ხვდებიან, „ჰაიდენჰაიმი“ კი საკუთარ მოედანზე „მაინცს“ მიიღებს. თუ ბუდუს გუნდი გაიმარჯვებს, კონკურენტები კი მინიმუმ ფრეს ითამაშებენ, „ჰაიდენჰაიმი“ პლეი-ოფში თამაშის უფლებას მოიპოვებს. ფრის გარდა, „ჰაიდენჰაიმს“ „სანქტ-პაულის გამარჯვებაც აძლევს ხელს, თუმცა თავისი თამაში აუცლებლად მოსაგები აქვს. ბუნდესლიგის დასკვნითი ტურის შეხვედრები 16 მაისს, ერთმანეთის პარალელურად ჩატარდება.