ქვილითაიას სადებიუტო გოლი - მეცი სასწაულის იმედადაა

საფრანგეთის ლიგა 1-ის 30-ე ტურში, ქართველების „მეცი“ საკუთარ მოედანზე „პარიზს“ დაუპირისპირდა და 3:1 დამარცხდა.

ქართველებიდან სასტარტო შემადგენლობაში გიორგი წიტაიშვილი იყო, გიორგი ქვილითაია კი მოედანზე 30-ე წუთზე, ტრავმირებული დიალოს ნაცვლად შევიდა. გიორგი აბუაშვილი კი მთავარმა მწვრთნელმა სათადარიგოთა სკამზე დატოვა.

გიორგი ქვილითაიამ ლიგა 1-ში სადებიუტო გოლის გატანა შეძლო. 31-ე წუთზე, როდესაც ანგარიში სტუმრების სასარგებლოდ 0:1 იყო, ქართველმა შემტევმა „პარიზის“ მცველების შეცდომით ბრწყინვალედ ისარგებლა და წონასწორობა აღადგინა. ქვილითაიას დუბლის შესრულება რამდენჯერმე შეეძლო, თუმცა მიზნამდე მცირედი დააკლდა. საბოლოოდ, ქართველმა ფეხბურთელმა თამაში ასეთი სტატისტიკით დაასრულა - ბურთთან 37 შეხება, კარისკენ 4 დარტყმა, 3 წარმატებული დრიბლინგი, 19-დან 14 ზუსტი პასი, 1 საკვანძო პასი, 1 განმუხტვა, 1 ართმევა, 8-დან 5 მოგებული ორთაბრძოლა. Sofascore-ს შეფასება - 7.5 ქულა.

რაც შეეხება გიორგი წიტაიშვილს, ქართველი ვინგერი თავის გუნდში ერთ-ერთი საუკეთესო იყო და საკმაოდ პროდუქტიული მატჩი ჰქონდა - ბურთთან 45 შეხება, კარისკენ 2 დარტყმა - 1 არაზუსტი, 2 ზუსტი. 5 წარმატებული დრიბლინგი, 22-დან 15 ზუსტი პასი, 2 საკვანძო პასი, 1 ზუსტი ჩაწოდება, 1 ვარდნა, 1 განმუხტვა. Sofascore-ს შეფასება - 7.4 ქულა.

30 ტურის შემდეგ „მეცი“ ლიგა 1-ის სატურნირო ცხრილში 15 ქულით ბოლო, მე-18 ადგილზე იმყოფება და გათამაშების დასრულებამდე 4 ტურით ადრე ლიგა 2-ში დაქვეითება პრაქტიკულად განაღდებული აქვს. „მეცს“ საპლეიოფო პოზიციას 10 ქულა აშორებს, სამშვიდობო ზონას კი 14 ქულით ჩამორჩა და მე-15 ადგილზე გასვლი თეორიული შანსი უკვე დაკარგა. ქართველების გუნდი მომდევნო მატჩს 26 აპრილს, სტუმრად, „ლე ავრის“ წინააღმდეგ გამართავს.