თოფურია: მახაჩევი სხვისი ფულის თვლას უნდა შეეშვას

ისლამ მახაჩევის თქმით, მისი ბრძოლა ილია თოფურიასთან იმიტომ არ შედგა, რომ „ელ მატადორმა“ ამისთვის არარეალური ჰონორარი მოითხოვა. თუმცა, ქართველი მებრძოლი თვლის, რომ ამ სიტუაციაში დაღესტნელი სხვისი ფულის თვლით არის დაკავებული.

„ეს ჩემთვის ტყუილად ჟღერს, რადგან სიმართლე ვიცი. პირველ რიგში, სპორტსმენს არ უნდა აღელვებდეს, რას ითხოვს სხვა სპორტსმენი. მე სხვის ფულს არ ვითვლი და არც მან უნდა გააკეთოს ეს. მას უკვე ჰქონდა თავის მართლება ერთხელ, ახლა კი ამას მეორედ აკეთებს. ეს ნამდვილად ისე გამოიყურება, თითქოს ის ბრძოლას თავს არიდებს“,

– განაცხადა თოფურიამ El Hormiguero-სთან ინტერვიუში.

მიუხედავად ამისა, თოფურია აღიარებს მახაჩევის დამსახურებებსა და მის უმაღლეს დონეს და სჯერა, რომ ერთ დღეს ისინი ოქტაგონის გაზიარებას შეძლებენ.

„ჩემთვისაც კი საინტერესოა საკუთარი თავის გამოცდა იმ მებრძოლის წინააღმდეგ, რომელიც ასე დიდხანს დომინირებდა თავის დივიზიონში, რადგან ის იყო ჩემპიონი იმ წონით კატეგორიაში, რომელშიც ახლა მე გამოვდივარ. რა შეიძლება იყოს იმაზე უკეთესი, ვიდრე საკუთარი თავის შედარება ასეთი რეზიუმეს მქონე ადამიანთან?

ამას ექსკლუზიურად სპორტული თვალსაზრისით ვუყურებ. ისლამს მივიჩნევ ტალანტად, მებრძოლად ოქტაგონზე მართლაც მაღალი დონის უნარებით, და თუ მათ ჩემსას შევაერთებთ, შეგვიძლია ყველასთვის ძალიან საინტერესო ბრძოლა მივიღოთ“,

– დასძინა თოფურიამ.

ილია თოფურია ოქტაგონზე 14 ივნისს, თეთრ სახლში დაგეგმილ UFC-ის სადღესასწაულო ტურნირზე დაბრუნდება, რომლის მთავარ მოვლენაშიც მსუბუქ წონაში ტიტულების გამაერთიანებელ ბრძოლას ამერიკელ ჯასტინ გეიჯის წინააღმდეგ ჩაატარებს. ხოლო ისლამ მახაჩევი აგვისტოში ნახევრად საშუალო წონით კატეგორიაში საჩემპიონო ქამრის დასაცავად გამოვა, თუმცა მისი მეტოქე ჯერჯერობით უცნობია.