გულიაშვილის დუბლი - რასინგი ანდორასთან განადგურდა

ესპანეთის ლა ლიგა 2-ის 34-ე ტურში, გიორგი გულიაშვილის „რასინგ სანტანდერი“ სტუმრად „ანდორას“ დაუპირისპირდა და 6:2 განადგურდა.

ქართველი შემტევი სასტარტო შემადგენლობაში იყო და ბოლომდე შეუცვლელად ითამაშა. საგულისხმოა, რომ თავდაპირველად, „რასინგი“ გულიაშვილის დუბლით 2:0 დაწინაურდა. ქართველმა ფეხბურთელმა ანგარიში მე-4 წუთზე გახსნა, მე-16 წუთზე კი მასპინძელთა კარში მეორე გოლი გაიტანა.

„რასინგმა“ ორბურთიანი უპირატესობა პირველივე ტაიმში გაანიავა. 34-ე წუთზე სედრამ სხვაობა მინიმუმამდე შეამცირა, 42-ე წუთზე კი ლაუტიმ ანგარიში გაათანაბრა.

მეორე ნახევარში გულიაშვილის გუნდმა კიდევ 3 უპასუხო ბურთი მიიღო. ამასთან, 73-ე წუთზე სტუმრებს კაციც გაუგდეს, რამაც „რასინგის“ თამაშს საბოლოო დაღი დაასვა.

გიორგი გულიაშვილმა „რასინგის“ შემადგენლობაში ლა ლიგა 2-ში მე-11 მატჩი ჩაატარა და დღევანდელი დუბლით 5 გოლი დააგროვა. ასევე, მის ანგარიშზე 1 საგოლე გადაცემაცაა.

მარცხის მიუხედავად, „რასინგ სანტანდერი“ სატურნირო ცხრილში 62 ქულით კვლავ პირველ ადგილზე იმყოფება. ქართველი ფეხბურთელის გუნდი მომდევნო შეხვედრას 12 აპრილს, საკუთარ მოდეანზე მესამეადგილოსან „ალმერიასთან“ გამართავს.