„7,3 მილიონი 18 წელში - ეს არც ისე ბევრია“ - ლაპორტა „ნეგრეირას" საქმეზე
„ბარსელონას“ პრეზიდენტმა ჟოან ლაპორტამ სასამართლოში განაცხადა, რომ პირადად არ იცნობდა ხოსე მარია ენრიკეს ნეგრეირას და მის შვილს.
ეს ცნობილი „ნეგრეირას საქმეზე“ ლაპორტას გამოქვეყნებული ჩვენებებიდან გახდა.
ლაპორტას თქმით, მან მსაჯობის შესახებ ანგარიშების მწარმოებელი კომპანიისთვის გადახდების შესახებ კლუბის პრეზიდენტის პოსტზე 2003 წელს არჩევის შემდეგ გაიგო, მაგრამ არ უთხრეს, ვინ იყო მისი მფლობელი.
„მე პირადად არ ვიცნობდი ენრიკეს ნეგრეირას. მე მაცნობეს, რომ არსებობდა საკონსულტაციო სამსახური მსაჯობის საკითხებზე, და ჩვენ გავაგრძელეთ მისი სერვისებით სარგებლობა, რადგან ეს სასარგებლოდ მივიჩნიეთ. ყველაფერი, რაზეც საუბარია, არის ის, რომ 18 წლის განმავლობაში გადაიხადეს 7,3 მილიონი ევრო. მოდით, ეს კონტექსტში განვიხილოთ. არ ვფიქრობ, რომ ეს ასეთი ძვირია ამ სერვისებისთვის, რომლებიც მნიშვნელოვანი და სასარგებლოა სპორტული სფეროსთვის.
ჩემთვის ცნობილია, რომ ანგარიშებს ბატონი ნეგრეირას შვილი ამზადებდა, და რომ ბატონი ნეგრეირა წარსულში მსაჯი იყო. ეს არის ყველაფერი, რაც მე ვიცოდი,“
– განაცხადა ლაპორტამ.
კითხვაზე პასუხის გაცემისას მისი პირველი საპრეზიდენტო ვადის (2003 წლიდან 2010 წლამდე) ანგარიშების შესახებ, ლაპორტამ განაცხადა, რომ ეს დოკუმენტები აღარ არსებობს.
„ნაპოვნია დაახლოებით 629 ანგარიში, რომლებიც უფრო გვიანდელ პერიოდებს ეხება. ისინი, რომლებიც ჩემს პრეზიდენტობას უკავშირდება... გაითვალისწინეთ, რომ დოკუმენტაცია ნადგურდება ყოველ ხუთ წელიწადში.
ჩვენ ეს ანგარიშები თითქმის შემთხვევით ვიპოვეთ, ისინი კარადაში, რაღაც ყუთებში იდო.
ჩვენ გვაქვს დეტალური ინვოისები პოზიციების მიხედვით, რომლებიც აღრიცხული, ნანახი იყო საგადასახადო ორგანოების მიერ და გაიარა აუდიტი. ნუ მესაუბრებით გულუხვობაზე, რადგან ეს ასე არ მუშაობს,“
– თქვა „ბარსელონას“ პრეზიდენტმა.
შეგახსენებთ, რომ 2023 წელს „ბარსელონას“ და მის ხელმძღვანელობას ბრალდება წაუყენეს ქრთამის აღებაში ესპანეთის ფეხბურთის სამეფო ფედერაციაში (RFEF) მომუშავე მსაჯთა ტექნიკური კომიტეტის (CTA) ყოფილი ვიცე-პრეზიდენტისთვის, ხოსე მარია ენრიკეს ნეგრეირასთვის თანხის გადახდის გამო. სასამართლომ დანაშაულად მიიჩნია ნეგრეირასთვის 2001 წლიდან 2018 წლამდე პერიოდში „ბარსელონას“ მიერ 7.7 მილიონი ევროს გადახდა, თუმცა საბოლოო განაჩენი დღემდე არ გამოქვეყნებულა. სასამართლო პროცესები გრძელდება და ამჟამად კატალონიური კლუბის წინააღმდეგ პირდაპირი სამხილი არ არსებობს, რომელიც არბიტრების მოსყიდვის ფაქტს ადასტურებს.
