„ისტორიაში ყველაზე მასშტაბური ჩხუბი იქნება“ - ომალი თოფურია-მახაჩევის ბრძოლას ითხოვს
ისლამ მახაჩევსა და ილია თოფურიას შორის საჩემპიონო ორთაბრძოლის გამართვაზე უკვე რამდენიმე წელია აქტიური საუბრები მიდის და ამ მხრივ, დუღილის ტემპერატურა დაღესტნელის გუშინდელმა მიღწევამ კიდევ უფრო მაღლა ასწია - მახაჩევმა „ელ მატადორის“ მიღწევა გაიმეორა და ისიც ორი წონითი დივიზიონის ჩემპიონი გახდა, რამაც ქომაგებს მათი დაპირისპირების სურვილი გაუორმაგა. თოფურია-მახაჩევის შესაძლო ჩხუბთან დაკავშირებით საინტერესო კომენტარი გააკეთა სუპერმსუბუქი წონის მებრძოლმა შონ ომალიმ, რომელსაც ასეთი მოსაზრება აქვს:
„რა თქმა უნდა, ისლამს ილიასთან გაცილებით უფრო დაძაბული ბრძოლა ექნება, ვიდრე ჯეკ დელა მადალენასთან ჰქონდა. მეტსაც გეტყვით, თოფურია-მახაჩევის დაპირისპირება შესაძლოა ამ სპორტის ისტორიაში ყველაზე მასშტაბური და ტექნიკური იყოს. ორივეს განვითარებული აქვს აბსოლუტურად ყველა უნარი, რაც MMA-ში წარმატების მისაღწევად არის საჭირო. მსოფლიოში შერეული ორთაბრძოლების ისტორიაში მათი დონის თითზე ჩამოსათვლელი მებრძოლები იყვნენ. ილია და ისლამი არიან სპორტსმენები, რომელთაც ერთნაირი წარმატებით შეუძლიათ დგომში ჩხუბი, პარტერში ბრძოლაში ჯიუ-ჯიცუს უნარების გამოყენება“.
შეგახსენებთ, რომ შონ ომალიმ ბოლო ერთი წლის განმავლობაში მერაბ დვალიშვილთან ორი ბრძოლა ჩაატარა და თუ პირველ შემთხვევაში მსაჯების გადაწყვეტილებით დამარცხდა, მეორე ჯერზე ქართველმა „მანქანამ“ მას საბმიშენით მოუგო.
