ორივე გოლში მიიღო მონაწილეობა - გოჩოლეიშვილის კარგი მატჩი ჰაიდენჰაიმთან

ბუნდესლიგის მე-4 ტურში გიორგი გოჩოლეიშვილის „ჰამბურგმა“ ბუდუ ზივზივაძის „ჰაიდენჰაიმს“ 2:1 მოუგო. გოჩოლეიშვილმა მატჩი ძირითად შემადგენლობაში დაიწყო და აქტიურად ერთვებოდა „ჰამბურგის“ შეტევებში. 42-ე წუთზე ქართველი მცველის აქტიურობის შემდეგ ლუკა ვუშკოვიჩმა მასპინძლები დააწინაურა და პირველი ტაიმი „ჰამბურგმა“ მინიმალური ანგარიშით მოიგო.

59-ე წუთზე რაიან ფილიპმა „ჰამბურგის“ მეორე გოლი გაიტანა, გოჩოლეიშვილმა კი პრეასისტი მიითვალა.

მსაჯის მიერ კომპენსირებულ დროში „ჰაიდენჰაიმმა“ ანგარიშში ჩამორჩენა შეამცირა - თავი შეცვლაზე შესულმა ადამ კოლემ გამოიჩინა.

გოჩოლეიშვილმა 85 წუთი ითამაშა, Sofascore-ისგან 7.4-იანი შეფასება დაიმსახურა, მისი სტატისტიკა კი ასეთი იყო: 48 შეხება ბურთთან, 20-დან 18 ზუსტი პასი (90%), 3 არაზუსტი ჩაწოდება, 1 არაზუსტი გრძელი პასი, 1 დარტყმა კარისკენ, 2 დაბლოკილი დარტყმა, 3-დან 2 წარმატებული დრიბლინგი, 6-დან 5 მოგებული ორთაბრძოლა, 1 ჩაჭრა. გოჩოლეიშვილმა 8-ჯერ დაკარგა ბურთი და მეტოქეს ორჯერ დაარღვევინა წესები.

გიორგი გოჩოლეიშვილის საუკეთესო მომენტები

რაც შეეხება ბუდუ ზივზივაძეს, წინა ტურში მიღებული წითელი ბარათის გამო ქართველ ფორვარდს 3-მატჩიანი დისკვალიფიკაცია მიუსაჯეს და თავის გუნდს კიდევ 2 მატჩში ვერ დაეხმარება.

4 ტურის შემდეგ „ჰამბურგი“ 4 ქულით სატურნირო ცხრილის მე-14 ადგილზე, „ჰაიდენჰაიმი“ კი 0 ქულით - ბოლო, მე-18 ადგილზეა. მომდევნო ტურში გოჩოლეიშვილის გუნდი ბერლინის „უნიონს“ ესტუმრება, „ჰაიდენჰაიმი“ კი „აუგსბურგს“ მიიღებს.