„ვისაც რამე უნდა აქ ვარ“ | თოფურიამ კროუფორდის განცხადებას უპასუხა
UFC-ის მსუბუქი წონითი დივიზიონის ჩემპიონმა, ილია თოფურიამ ტერენს კროუფორდს უპასუხა. დღეს „ბადმა“ განაცხადა, რომ „ელ მატადორი“ ალბათ მთვრალი იყო, როდესაც თქვა, რომ მას პირველ შეხებაზე დაანოკაუტებს და WOW-ს პრესკონფერენციაზე თოფურიას სწორედ ამაზე ჰკითხეს.
„ბოლო დროს, რაც ძალიან მაწუხებს ის არის, რომ ბევრი მოკრივე გამოდის, ჩვენს საქმეში ერევა, გვაკრიტიკებს და ცდილობს, დაგვამციროს. სიმართლე ისაა, რომ MMA-ის ბევრ სპორტსმენს გამოუცდია საკუთარი უნარები კრივში. თუმცა, ბევრი მოკრივე ნამდვილად არ ვიცი, რომლებიც ამდენს ლაპარაკობენ და MMA-ში საკუთარი თავი გამოუცდიათ. ნებისმიერ შემთხვევაში, ვისაც რამე უნდა, აქ ვარ.“
ცნობისთვის, WOW-ს პრესკონფერენციაზე ილიამ სამომავლო გეგმებზეც ისაუბრა. „ელ მატადორმა“ განაცხადა, რომ UFC-სთან მოლაპარაკებები აქვს, მაგრამ ჯერჯერობით არ იცის, როდის იჩხუბებს და მისი მომდევნო მოწინააღმდეგე ვინ იქნება.
გეტყვით იმასაც, რომ კროუფორდი 14 სექტემბერს ლას-ვეგასში კანელო ალვარესთან საკრივო ორთაბრძოლას გამართავს. „ბადი“ დაუმარცხებელია და 41 ჩხუბიდან 41 გამარჯვება აქვს.
