„იტალია ძალიან კარგი გუნდია“ | ბითაძემ მომდევნო მეტოქეზე ისაუბრა
საქართველოს ნაკრების კალათბურთელმა, გოგა ბითაძემ მომდევნო მეტოქეზე ისაუბრა. ესპანეთის დამარცხების შემდეგ ალეკსანდერ ჯიკიჩის გუნდი იტალიას დაუპირისპირდება და გოგას თქმით, მოწინააღმდეგეს ძალიან კარგი გუნდი ჰყავს.
„ესპანეთთან გამარჯვება ძალიან მნიშვნელოვანი იყო, თუმცა თამაშები კიდევ გვაქვს მოსაგები. საბერძნეთისა და იტალიის მატჩს ვუყურეთ და იტალია ძალიან კარგი გუნდია. მარტივი სიტუაციებიდან ბურთები ვერ ჩააგდეს, თორემ მოგებაც შეეძლოთ. რთული შეხვედრა გველის და შევეცდებით, საჭირო ნაბიჯები გადავდგათ, რომლებიც გამარჯვებაში დაგვეხმარება.“
ცნობისთვის, ევრობასკეტის პირველ ტურში იტალიის ნაკრების მეტოქე საბერძნეთი იყო და ბერძნებმა 66:75 გაიმარჯვეს. შეხვედრის საუკეთესო კალათბურთელი იანის ანტეტოკოუნმპო გახდა, რომელმაც მატჩი 31 ქულით, 7 მოხსნითა და 2 შედეგიანი გადაცემით დაასრულა.
გეტყვით იმასაც, რომ საქართველოსა და იტალიის ნაკრებების დაპირისპირება 30 აგვისტოს გაიმართება და თბილისის დროით, 16:00-ზე დაიწყება. იტალიის შემდეგ ჩვენ გუნდი საუკეთესოს ვინაობას საბერძნეთთან გაარკვევს.
