დადვანი სერბეთის ჩემპიონია - ქართველი წყალბურთელის წარმატება

საქართველოს ნაკრების წყალბურთელი ვატო დადვანი სერბეთის ჩემპიონატის გამარჯვებული გახდა. „რადნიჩკიმ“, სადაც 22 წლის ქართველი სპორტსმენი ასპარეზობს, ფინალურ სერიაში „ნოვი ბეოგრადი“ 2:1 დაამარცხა და ქვეყნის პირველობის ოქროს მედლები არსებობის ისტორიაში მეორედ მოიგო. წლევანდელ სეზონში დადვანი და მისი თანაგუნდელები სამი ტურნირის მოგებასთან ახლოს იყვნენ, თუმცა ევროთასის ფინალში იტალიის „პრო რეკოსთან“ 12:16 დამარცხდნენ.

რაც შეეხება სერბეთის ჩემპიონატის ფინალს, სერია „რადნიჩკიმ“ საკუთარ აუზზე ერთბურთიანი სხვაობით, 13:12 გამარჯვებით დაიწყო, რასაც უკვე მეორე მატჩში ორბურთიანი უპირატესობით 11:13 მარცხი მოჰყვა. გადამწყვეტ მესამე მატჩში კი ვატომ და მისმა თანაგუნდელებმა 14:13 მოიგეს. დადვანმა სამივე შეხვედრაში 2 ბურთი გაიტანა და თანაგუნდელებს შორის ერთ-ერთი საუკეთესო გახლდათ.

ცნობისათვის, სერბეთის ჩემპიონატის გარდა, მიმდინარე სეზონში „რადნიჩკიმ“ რეგიონალური ლიგის პრესტიჟული გათამაშება მოიგო და დადვანი როგორც ნახევარფინალური, ასევე ფინალური სერიის MVP გახდა.