ნიუკასლის სკაუტი რაიო ვალეკანოსთან გამართულ მატჩს დაესწრო | მამარდა მთავარი სამიზნეა
ესპანეთის ლა ლიგის 35-ე ტურში, გიორგი მამარდაშვილის „ვალენსია“ „მესტალიაზე“ „რაიო ვალეკანოს“ დაუპირისპირდა. მატჩი ფრედ, 0:0 დასრულდა, „მამარდამ“ კი შესანიშნავი შთაბეჭდილება დატოვა და შეხვედრის საუკეთესო მოთამაშედ დასახელდა.
ესპანური გამოცემის, Relevo-ს ინფორმაციით, „რაიო ვალეკანოსთან“ გამართულ მატჩს „ნიუკასლის“ სკაუტი დაესწრო და მამარდაშვილს დააკვირდა. ეს პირველი შემთხვევა არაა, როცა „კაჭკაჭების“ წარმომადგენლები ესპანეთში ჩადიან და „ვალენსიას“ შეხვედრებს ესწრებიან. იმავე Relevo-ს ცნობით, მიმდინარე სეზონში მსგავსი რამ მინიმუმ 5-ჯერ მოხდა.
როგორც ირკვევა, მამარდაშვილი „ნიუკასლის“ ერთ-ერთი მთავარი სამიზნეა, მაგრამ ინგლისელებს ალტერნატიული ვარიანტიც ჰყავთ, Relevo-ს მიხედვით, „კაჭკაჭები“ აარონ რამსდეილის გარშემო შექმნილ ვითარებას აქტიურად აკვირდებიან. „მამარდას“ სანაცვლოდ „ჩე“ მინიმუმ 35-40 მილიონ ევროს მოითხოვს, „არსენალი“ კი მზადაა, რამსდეილს 30 მილიონად შეელიოს.
შეგახსენებთ, რომ „ნიუკასლის“ ინტერესზე Marca-მაც დაწერა და გვაუწყა, რომ გიორგი „კაჭკაჭების“ მთავარი სამიზნეა. ქართველ ფეხბურთელს „ღამურებთან“ ხელშეკრულება 2027 წლის ზაფხულამდე აკავშირებს და მისი გამოსასყიდი თანხა 100 მილიონი ევროა.