ოფიციალურად: ვასილ ლობჟანიძის ახალი გუნდი ცნობილია
საქართველოს ნაკრების მორაგბე, ვასილ ლობჟანიძე კარიერას საფრანგეთის Top 14-ის გუნდ „ოიანაში“ გააგრძელებს. ინფორმაცია ფრანგულმა კლუბმა ოფიციალურად დაადასტურა.
გავრცელებული ინფორმაციით, ქართველმა მორაგბემ ახალ გუნდთან 2-წლიანი კონტრაქტი გააფორმა და „ოიანაში“ 2026 წლის ზაფხულამდე დარჩება.
???? ???????????????? ???????????????????? ???????? ????????́???????????????????????????? ???????????? ???????????????????????????????? ????????????????????????... pic.twitter.com/P45RJAYU91
— Oyonnax Rugby (@OyonnaxRugby) April 10, 2024
ლობჟანიძე ბოლოს „ტულონში“ სამედიცინო ჯოკრის სტატუსით თამაშობდა, თუმცა, ბოლო პერიოდში სათამაშო დრო პრაქტიკულად არ ეძლეოდა, რის გამოც კლუბის გამოცვლა გადაწყვიტა. საგულისხმოა, რომ „ბორჯღალოსნების“ 9 ნომერი ახალ გუნდშიც სამედიცინო ჯოკრის სტატუსით გადავიდა.
ვასილ ლობჟანიძეს კარიერის უდიდესი ნაწილი ფრანგულ „ბრივში“ აქვს გატარებული. 27 წლის მორაგბე ამ კლუბის ღირსებას 2016-2023 წლებში იცავდა. ლობჟანიძეს საქართველოს ნაკრებში 70 კეპი აქვს მოგროვებული.
„ოიანა“ საფრანგეთის Top 14-ის სატურნირო ცხრილში ბოლო ადგილზე იმყოფება და დიდი ალბათობით, Pro D2-ში დაქვეითდება, თუმცა, ლობჟანიძის ახალ გუნდს Top 14-ში დარჩენის თეორიული და პრაქტიკული შანსი მაინც აქვს.
