ბარსელონამ მე-100 ელ კლასიკო მოიგო
ესპანეთის ლა ლიგის 26-ე ტურის ცენტრალურ მატჩში გულშემატკივარმა „ელ კლასიკო“ იხილა. 286-ე კლასიკოში „ბარსელონამ“ საკუთარ მოედანზე მადრიდის „რეალს უმასპინძლა და დაძაბულ ბრძოლაში, მინიმალური სხვაობით - 2:1 დაამარცხა.
საგულისხმოა, რომ პირველი ტაიმის ბოლომდე კატალონიელები მინიმალური სხვაობით მარცხდებოდნენ, თუმცა საბოლოოდ მდგომარეობა თავისდასასიკეთოდ შემოატრიალეს და დამსახურებულადაც გაიმარჯვებს.
კარლო ანჩელოტის გუნდი მე-9 წუთზე რონალდ არაუხოს ავტოგოლით დაწინაურდა. ვინისიუსის მიერ ჩაწოდებული ბურთი ურუგვაელ მცველს თავზე მოხვდა და საბოლოოდ, ტერ შტეგენის კარში აღმოჩნდა.
მასპინძლებმა წონასწორობა ტაიმის მიწურულს, 45-ე წუთზე აღადგინეს. მადრიდელთა საჯარიმოში შექმნილი არეულობით სერხი რობერტომ ისარგებლა და ტიბო კურტუას შანსი არ დაუტოვა.
მეორე ნახევარში, 81-ე წუთზე მარკო ასენსიომ გაიტანა, თუმცა მთავარმა მსაჯმა გოლი VAR-ზე გადამოწმების შემდეგ გააუქმა. ამ ეპიზოდიდან ზუსტად 10 წუთში კი „რეალის“ კარში გამარჯვების გოლის ავტორი ფრენკ კესი გახდა, რომელმაც ბალდეს გადაცემა გამოიყენა და „ბარსელონას“ კლასიკოების ისტორიაში მე-100 გამარჯვება მოუტანა.
26 ტურის შემდეგ, „ბარსელონა“ ლა ლიგის სატურნირო ცხრილს 68 ქულით ლიდერობს და უახლოეს მდევარ მადრიდის „რეალს“ 12 ქულით უსწრებს.