სტერლინგი: „მერაბი იანს დაამარცხებს, ჩვენ მსოფლიოში N1 და N2 გავხდებით“

ალჯამეინ სტერლინგმა Youtube-ში, საკუთარ არხზე პიოტრ იანსა და მერაბ დვალიშვილის დაპირისპირებაზე ისაუბრა. მისი აზრით, ამ შეხვედრას ქართველი მებრძოლი მოიგებს, თუმცა ალჯამაინი აღნიშნავს, რომ იანის რამდენიმე ეშმაკური ილეთი აქვს და მერაბმა ყურადღება უნდა გამოიჩინოს.

„სწორად გამიგეთ, იანი კარგი მებრძოლია. ვიცნობ მას, ერთად ვიჯექით და ბევრს ვხუმრობდით.

პიოტრ იანი ჩემს დამარცხებასთან ახლოს იყო, მე კი საკუთარი თავის აჩრდილს ვგავდი, თუმცა მუხლის ერთმა დარტყმამ ქამარი დააკარგვინა, რადგან მან წესები არ იცის.

ჩვენ ახლა მსოფლიოს ორი საუკეთესო მებრძოლი გვყავს. როდესაც მერაბი იანს დაამარცხებს, მსოფლიოს ნომერ პირველი და ნომერ მეორე მებრძოლები ვიქნებით.

ვფიქრობთ, მერაბი იმას გააკეთებს, რასაც ყოველთვის - გაიმარჯვებს. პრესინგს მიმართავს, განწყობას შეხვედრის ბოლომდე შეინარჩუნებს, ყურადღებით იმოქმედებს.

პიოტრი ძლიერი მეტოქეა, რამდენიმე ეშმაკურ ილეთს იყენებს, რასაც მერაბი განსაკუთრებული ყურადღებით უნდა შეხვდეს. ამ შეხვედრას მერაბი მოიგებს“.

Mma Junkie-ის ცნობით, მერაბ დვალიშვილისა და პიოტრ იანისის ბრძოლა 11 მარტს (ადგილობრივი დროით, თბილისის დროით 12 მარტს), ლას ვეგასში მდებარე Virgin Hotels-ში გაიმართება და UFC Fight Night 221-ის მთავარი მოვლენა იქნება, რაც ნიშნავს, რომ ჩხუბი 5 რაუნდს გაგრძელდება. მხარეებს შორის სიტყვიერი შეთანხმება უკვე მიღწეულია, მაგრამ მებრძოლებს კონტრაქტისთვის ხელი ჯერ არ მოუწერიათ.

შეგახსენებთ, რომ მერაბ დვალიშვილმა ბოლო ბრძოლა ლეგენდარული ჟოზე ალდოს წინააღმდეგ გამართა. „მანქანამ“ მსაჯების გადაწყვეტილებით იმარჯვა და წარმატებული ასპარეზობის შემდეგ, თავისი წონითი დივიზიონის რეიტინგში მეორე ადგილზე გადაინაცვლა, თუმცა ამ წუთისთვის, მესამეა.

იანს რაც შეეხება, რუსმა ბოლოს შონ ომალის წინააღმდეგ იჩხუბა და მსაჯების გადაწყვეტილებით დამარცხდა, თუმცა ბევრი ქომაგის აზრით, მოგება მას ეკუთვნოდა. რუს მებრძოლს კარიერაში 20 ბრძოლა აქვს გამართული და მის ანგარიშზე 16 მოგება და 4 მარცხია. იანმა ბოლო 4 შეხვედრიდან 3 დათმო და სუპერ მსუბუქი წონითი დივიზიონის რეიტინგში მე-2 ადგილი სწორედ მას უკავია.