„ძალიან სახიფათოა“ - La Gazzetta dello Sport-მა დოლიძეზე დაწერა

ავტორიტეტულმა იტალიურმა გამოცემამ, La Gazzetta dello Sport-მა ქართველ მებრძოლზე, რომან დოლიძეზე დაწერა. „კავკასიელი“ მომდევნო ჩხუბს იტალიელი მარვინ ვეტორის წინააღმდეგ გამართავს და La Gazzetta dello Sport-ი სწორედ ამ დაპირისპირებას გამოეხმაურა.

„დოლიძე არის მეტოქე, ვისი დამარცხებაც ვეტორის შეუძლია, მაგრამ ის ძალიან სახიფათოა, რადგან სწრაფია და ზედიზედ მოპოვებული 4 გამარჯვების გამო, რომლებიდანაც 3 ნოკაუტით იყო, თავდაჯერებულია. გასულ მარტში, მას კიდევ ერთი იტალიელის, ალესიო დე კირიკოს წინააღმდეგ უნდა ეჩხუბა, მაგრამ ამ უკანასკნელმა ტრავმა მიიღო და არგენტინელმა სტაროპოლიმ ჩაანაცვლა, რომელთანაც დოლიძემ 3-რაუნდიან ბრძოლაში იმარჯვა.

რომანი ნახევრად მძიმე წონით დივიზიონში ასპარეზობდა და ფიზიკური გაბარიტების მხრივ, მცირე უპირატესობა აქვს. ბრწყინვალე გრეპლინგთან ერთად, დოლიძე არც თუ ისე ლამაზი, მაგრამ ძლიერი სტრაიკინგით გამოირჩევა. მასთან მოპოვებული გამარჯვების შემთხვევაში, ვეტორი ერთ-ერთი იქნება, ვისაც საჩემპიონო ამბიცია ექნება“.

შეგახსენებთ, რომ ვეტორის კარიერაში 25 ბრძოლა აქვს გამართული და მის ანგარიშზე 18 გამარჯვებაა. იტალიელს ისეთ მებრძოლებთან ჩხუბის გამოცდილება აქვს, როგორიც რობერტ უიტეკერი, პაულო კოსტა, ისრაელ ადესანია, კევინ ჰოლანდი და ჯეკ ჰერმანსონი არიან.