“მბაპეს კონტრაქტის დეტალები სიცრუეა“ - პსჟ Le Parisien-ს უჩივლებს
როგორც მოგეხსენებათ, ზაფხულის სატრანსფერო ფანჯრის დროს კილიან მბაპე თითქმის მადრიდის „რეალში“ იყო გადასული, თუმცა „პარი სენ ჟერმენმა“ მას ზღაპრული კონტრაქტი შესთავაზა და დარჩა.
გუშინ, გამოცემა Le Parisien-მა პსჟ-სთან მბაპეს კონტრაქტი გამოაქვეყნა, რომელშიც კოლოსალურ თანხებზე იყო საუბარი.
რა დაწერა Le Parisien-მა?
ხელფასი წლიურად - 72 მილიონი ევრო. კონტრაქტის ხელმოწერის ბონუსი 180 მილიონი ევრო, 3 ნაწილად. მასშტაბური ლოიალობის ბონუსი, გადახდილი იქნება ყოველი საზაფხულო ფანჯრის შემდეგ: €70 მილიონი, შემდეგ €80 მილიონი, შემდეგ €90 მილიონი, თუ კილიანი გააფორმებს კიდევ 1 წლიან კონტრაქტს დამატებით.
ამ ინფორმაციამ მსოფლიო მოიარა და პარიზულ კლუბს უდიდესი კრიტიკა დაატყდა თავს. დღეს კი „პარი სენ ჟერმენმა“ ყველას ამცნო, რომ Le Parisien-ის ინფორმაცია არის სრული სიცრუე და სიმართლეს არ შეესაბამება. ფრანგული გუნდის ხელმძღვანელობა გამოცემისთვის სასამართლოში ჩივილს აპირებს.
