პსჟ-ს ინტერესი სერიოზულია - მბაპე და გალტიე ვლაჰოვიჩს ითხოვენ
ცნობილია, რომ „პარი სენ ჟერმენს“, კრისტოფერ გალტიეს და თავად კილიან მბაპეს გუნდში ახალი თავდამსხმელი სურთ. ეს ახალი არავისთვის არის. ზაფხულის სატრანსფერო ფანჯრის დროს, პსჟ ბევრს აქტიურობდა, თუმცა გამოკვეთილი ცენტრალური თავდამსხმელის მოყვანა ვერ შეძლო.
იტალიური მედიის ინფორმაციით, ნასერ ალ-ხელაიფი ტურინის „იუვენტუსის“ ვარსკვლავს დუშან ვლაჰოვიჩს აკვირდება. ეს კანდიდატურა კი გალტიესთვის და მბაპესთვის მისაღებია.
22 წლის სერბი „ბებერ ქალბატონს“ მიმდინარე წლის იანვარში 80 მილიონი ევროს სანაცვლოდ შეუერთდა და ახალ კლუბთან 4-წლიან ხელშეკრულებას მოაწერა ხელი. ვლაჰოვიჩმა თამაში კარგად დაიწყო და ქომაგებს თავი მალე შეაყვარა, მაგრამ ახლა სიტუაცია შეცვლილია.
თავად ფეხბურთელი უკმაყოფილოა და თვლის, რომ მისი მიმართულებით იმდენი პასი არ კეთდება, რამდენიც ადრე. აქედან გამომდინარე, დუშანს ბევრი გოლი ვეღარ გააქვს და „იუვენტუსში“ შექმნილი სიტუაციითაც უკმაყოფილოა.
Tuttosport-ის ინფორმაციით, ზამთრის სატრანსფერო ფანჯრის დროს, „პარი სენ ჟერმენი“ სერბი შემტევის გადასაბირებლად ყველაფერს გააკეთებენ, თუმცა ტრანსფერის განხორციელება საკმაოდ რთული იქნება. ძნელად სავარაუდოა, რომ „ბიანკონერის“ ხელმძღვანელობა ამ მომენტისთვის მათი მთავარი ვარსკვლავის გაყიდვას დათანხმდეს.
Il Psg può fiondarsi su Vlahovic: 'Poco feeling con Allegri', Galtier vuole il serbo https://t.co/2hkrW4AHZB pic.twitter.com/b1fONKo3OY
— ilbianconero (@ilbianconerocom) October 1, 2022
ვლაჰოვიჩი იუვეში
როგორც უკვე მოგახსენეთ, დუშანი ტურინულ გრანდს მიმდინარე წლის იანვარში შეუერთდა. დღემდე ვლაჰოვიჩმა „იუვენტუსის“ მაისური ყველა ტურნირზე ერთად 29-ჯერ მოირგო, 13 გოლი გაიტანა და 2 საგოლე გადაცემა შეასრულა.