36 გუნდი - UEFA-მ ჩემპიონთა ლიგის ახალი ფორმატი დაამტკიცა
UEFA-მ ჩემპიონთა ლიგის ახალი ფორმატი დაამტკიცა, რომლის მიხედვით ევროპის ყველაზე პრესტიჟული ტურნირის ძირითად ბადეში გუნდების რაოდენობა 32-დან 36-მდე გაიზრდება. დამატებით 4 ადგილს ის ქვეყნები მიიღებენ, რომლებიც ევროტურნირების ბოლო გათამაშებაში წარმატებულად ითამაშებენ.
თითოეული გუნდი 8 შეხვედრას გამართავს (4 - შინ, 4 - სტუმრად). კონკრეტული ერთი გუნდი რვა სხვადასხვა მეტოქის წინააღმდეგ ითამაშებს. მოქმედი სისტემა 4-გუნდიან ჯგუფს გულისხმობს, სადაც თითოეული გუნდი სამ გუნდთან ორ დაპირისპირებას მართავს (შინ და სტუმრად).
1-8 ადგილზე გასული კლუბები 1/8-ფინალში ასპარეზობის უფლებას მოიპოვებენ, 9-24 ადგილზე გასული კლუბები ორმატჩიან ფლეი-ოფში 1/8-ფინალში გასული კლუბის ვინაობას გაარკვევენ. მერვედფინალური ეტაპიდან გათამაშება მოქმედი სისტემის მიხედვით გაგრძელდება.
აღნიშნული ცვლილებები 2024-25 წლების სეზონში ამოქმედდდება. სიახლეები ევროპა ლიგისა და კონფერენს ლიგის ტურნირებსაც შეეხება. სისტემა ანალოგიური იქნება, ევროპა ლიგაზე ერთი გუნდი 8 სხვადასხვა მეტოქესთან ითამაშებს (4-შინ, 4- სტუმრად), ხოლო კონფერენს ლიგის ძირითად ბადეში თითოეული გუნდი 6 სხვადასხვა გუნდთან 6 მატჩს ჩაატარებს (3 - შინ, 3 - სტუმრად).
UEFA-ს პრეზიდენტმა ალექსანდრ ჩეფერინმა აღნიშნულ გადაწყვეტილებაზე ისაუბრა:
''მჯერა, ახალი ფორმატის პირობებში გარემო უფრო დაბალანსებული გახდება, კონკურენცია გაიზარდება, ტურნირის შემოსავალი სოლიდური იქნება, რომელიც კლუბებსა და ჩემპიონატებზე გადანაწილდება. ახალ ფორმატთან დაკავშირებით გადაწყვეტილება ერთსულოვნად მივიღეთ''.