პრობლემა გერმანიის ნაკრებში - 5 ფეხბურთელი იზოლაციაშია

საფეხბურთო სამყაროში სანაკრებო ბატალიების დროა. მსოფლიო ჩემპიონატის საკვალიფიკაციო ეტაპისთვის გერმანიის ნაკრები ემზადება, თუმცა ჰანსი ფლიკის გუნდს პრობლემები შეექმნება.

გერმანული მედიის ინფორმაციით, „ბუნდეს ნაკრების“ 5 ფეხბურთელი თვითიზოლაციაშია გადასული. ამის მიზეზი კი, რა თქმა უნდა, კორონავირუსია. ცნობილი ხდება, რომ კოვიდ ინფექცია „ბაიერნის“ უკანახაზელს ნიკლას ზიულეს აღმოჩნდა.

იზოლაციაში მყოფ 4 ფეხბურთელს პირველადი ტესტის შემდეგ პასუხი უარყოფითი მოუვიდათ, თუმცა ნაკრებთან ერთად ჯერჯერობით მაინც არ ვარჯიშობენ. უცნობია, თუ რომელი მოთამაშეები არიან თვითიზოლაციაში.

შეგახსენებთ, რომ მსოფლიოს 4-გზის ჩემპიონი მსოფლიო ჩემპიონატის საკვალიფიკაციო ეტაპზე უახლოეს დღეებში ლიხტენშტეინს და სომხეთს დაუპირისპირდება. პირველი მატჩი 11 ნოემბრით თარიღდება და ჰანსი ფლიკის შეგირდები „ვოლფსბურგ“ არენაზე ლიხტენშტეინს უმასპინძლებენ, ხოლო 15 ნოემბერს სომხეთში გაემგზავრებიან.