ოფიციალურად: საქართველო-ბელარუსის მატჩი გადაიდო!
უეფამ ვიდეოკონფერენცია გამართა, რომელშიც ევროპული ფეხბურთის მმართველ ორგანოში შემავალი 55 სუბიექტი მონაწილეობდა.
აღნიშნული ვიდეოკონფერენციის შესახებ პირველი ინფორმაცია ნორვეგიის ფეხბურთის მმართველმა ორგანომ გაავრცელა, რომლის მიხედვით ევროპის ჩემპიონატი 2020 წელს არ გაიმართება. უეფას გადაწყვეტილებით ევროპის ჩემპიონატი 2021 წლის ზაფხულში შედგება.
UEFA har bestemt at EM utsettes til 2021. Det skal spilles fra 11. juni til 11. juli neste år. Mer informasjon kommer.
— NorgesFotballforbund (@nff_info) March 17, 2020
ქართული ფეხბურთის გულშემატკივრებისთვის ყველაზე მნიშვნელოვანი 26 მარტს დაგეგმილი მატჩია, ერთა ლიგის ნახევარფინალში საქართველოს ეროვნული ნაკრების მეტოქე ბელარუსიაა. აღნიშნული შეხვედრა კორონავირუსის გამო გადაიდო, ინფორმაციას სფფ-ის პრეზიდენტი ლევან კობიაშვილი twitter-ზე ადასტურებს.
Following @UEFA’s decision, the European Championship play-off fixtures, including the match between @GeorgianFF and @BelFootFeder that was due to take place on 26 March, have been postponed due to the outbreak of the #COVID19 virus. pic.twitter.com/t4CtzqtDn3
— Levan Kobiashvili (@LKobiashvili) March 17, 2020
მოგვიანებით ინფორმაცია საქართველოს ფეხბურთის ფედერაციამ დაადასტურა. ამ ეტაპზე, მატჩის გამართვის ზუსტი თარიღი უცნობია.
საქართველოს ფეხბურთის ფედერაციის გენერალურმა მდივნმა დვაით მუჯირმა აღნიშნა, რომ სავარაუდოდ მარტში დაგეგმილი სანაკრებო მატჩები ივნისის თვეში გაიმართება. მუჯირის კომენტარს ფეხბურთის ფედერაციის ოფიციალური ვებგვერდი ავრცელებს.
''დღევანდელი ვიდეოკონფერენციის მთავარი განსახილველი თემა ევრო 2020 გახლდათ. ამ ეტპაზე ყველაფერი დამოკიდებულია თუ როგორ და როდის განახლდება ევრონული ჩემპიონატები. მოგეხსენებათ, რომ საქართველოსთან ერთად ბევრ სხვა ქვეყანაში შიდა ჩემპიონატი შეჩერებულია. ამ ყველაფრიდან გამომდინარე გაურკვეველია თუ რომელი გუნდები იასპარეზებენ მომავალ სეზონში ევრო ტურნირებზე. ყველაფრის გათვალისწინებით უეფამ დღეს წარმოადგინა სამოქმედო გეგმა, რომელიც დასამტკიცებლად აღმასკომს გადაეცემა.
დიდი ალბათობით აღნიშნული პროექტი დამტკიცდება, რადგან არც ერთ ასოციაციას საწინააღმდეგო აზრი არ გამოუთქვამს. ევროპის ჩემპიონატი დიდი ალბათობით გადაიდება მომავალი წლისთვის და 11 ივნისიდან 11 ივლისის ჩაითვლით გაიმართება. ასევე შეიცვლება ჩემპიონთა ლიგისა და ევროპა ლიგის მატჩების დღეები. ცვლილება, რა თქმა უნდა, შეეხო ევროპის ჩემპიონატის პლეი-ოფის მატჩებს, რომელიც თითოეული ჩვენგანისთვის ძალიან მნიშვნელოვანია. დღევანდელი მოცემულობით მარტში ბელარუსის წინააღმდეგ გასამართი მატჩი ივნისში ჩატარდება.
ყველა ეს ცვლილება გათვლილია იმაზე, რომ მსოფლიოში არსებული მდომარეობა უკეთესობისკენ შეიცვლება. არსებობს ჩემპიონატების განახლების რამდენიმე ვარიანტი. მოგეხსენებათ, რომ უეფას ჩემპიონთა ლიგისა და ევროპა ლიგის გათამაშება აქვს დასასრულებელი. იქიდან გამომდინარე, რომ დღევანდელი მდგომარეობით ჩემპიონატების განახლების კონკრეტული თარიღი უცნობია, არსებობს რამდენიმე ვარიანტი, როდესაც ევროპაში შიდა ჩემპიონატები განახლდება. განახლების თარიღზეა დამოკიდებული ევრო ტურნირების ფორმატიც. ამ მდგომარეობით ჩემპიონთა ლიგის ფინალის გამართვის თარიღად 27 ივნისი სახელდება.
მოვლენების ამ სცენარით განვითარების შემთხვევაში ჩვენთვის ყველაზე საინტრესო მატჩი ბელარუსის წინააღმდეგ ივნისის დასაწყისში გაიმართება. თუმცა მანამდე უნდა განახლდეს ის ჩემპიონატები სადაც ჩვენი ლეგიონერები ასპარეზობენ და ქვეყნებს შორის გადაადგილება უნდა გახდეს უსაფრთხო. ამასთან ერთად ყველაზე მნიშვნელოვანია, რომ ჩვენი ფეხბურთელების ჯანმრთელობაზე ვიზრუნოთ.''
შეგახსენებთ, სფფ-მ 11 მარტს კრისტალბეთ ეროვნული ლიგის, კრისტალბეთ ეროვნულ ლიგა 2-ის, ლიგა 3-ისა და ყველა სხვა ჩემპიონატის პირველ აპრილამდე შეჩერების გადაწყვეტილება მიიღო. ასევე, შეჩერდა ასაკობრივი გუნდების ჩემპიონატები.
ფოტო: gff.ge