Aa Aa
17 ივლისი 2019  |  15:20

GDS: "მილანის" პრიორიტეტი ლოვრენია!

იტალიური „მილანი“ ცენტრალური მცველის ძებნას აგრძელებს და თუკი აპენინურ პრესას ვენდობით, ამ კუთხით აქტიურადაც მუშაობს.

Gazzetta dello Sport-ის ცნობილი ჟურნალისტის, ნიკოლო შირას, თქმით, „შავ-წითელთა“ პრიორიტეტი „ლივერპულის“ 30 წლის ხორვატი - დეიან ლოვრენია. ფეხბურთელის აგენტმა გუშინ საღამოს „კაზა მილანში“ რამდენიმესაათიანი შეხვედრა გამართა.

როგორც ირკვევა, მილანელები ლოვრენს 4-წლიან კონტრაქტსა და ჯამში 12 მილიონ ევროს სთავაზობენ, თუმცა ხორვატს წლიურად 5 მილიონი ევროს მიღება სურს. ლოვრენს „ლივერპულთან“ კონტრაქტი მომავალ ზაფხულამდე აკავშირებს, სავარაუდო სატრანსფერო თანხად კი 20 მილიონი ევრო სახელდება.

იტალიური პრესა „როსონერის“ ორი სათადარიგო ვარიანტის შესახებაც წერს - დაიო უპამეკანო და ერიკ ბაილი. ეს უკანასკნელი „მანჩესტერ იუნაიტედს“ მომავალ ზაფხულამდე ეკუთვნის და კლუბის შეცვლის წინააღმდეგი არაა.

რაც შეეხება 20 წლის უპამეკანოს, იგი ევროპულ ბაზარზე საკმაოდ მოთხოვნადი ფიგურაა. ფეხბურთელს „ლაიფციგთან“ ხელშეკრულება 2021 წლის ზაფხულამდე აქვს გაფორმებული და რადგან სატრანსფერო ფასი საკმაოდ მაღალია, მილანელები გარიგებაში ჰაქან ჩალჰანოღლუს ჩართვის ვარიანტს განიხილავენ.

გაზიარება:

მსგავსი სიახლეები