მან.სიტის პრემიერ ლიგიდან გააგდებენ? - სასამართლო პროცესი მიმდინარეობს

„მანჩესტერ სიტი“ პრემიერ ლიგის მიერ წარდგენილი 134 დისციპლინური ბრალდებიდან აბსოლუტური უმრავლესობის დარღვევაში დამნაშავედ ცნეს.

ამ საქმის ისტორიიდან გამომდინარე, რომელიც მთლიანად დახურულ რეჟიმში მიმდინარეობდა და რომლის ფარგლებშიც ყველა მხარე კონფიდენციალურობის დაცვას დათანხმდა, ბევრი რამ ჯერ კიდევ უცნობია. ჩვენ(The Guardian) ოფიციალური დადასტურებაც კი არ გვაქვს, რომ სამკაციანმა სასამართლო პანელმა საბოლოო გადაწყვეტილება უკვე მიიღო. თუმცა, საფეხბურთო სამყარო ისე იქცევა, თითქოს გადაწყვეტილება უკვე ცნობილია და ინფორმაცია იმის შესახებ, რომ პრემიერ ლიგამ მნიშვნელოვანი გამარჯვება მოიპოვა, სიმართლეს შეესაბამება.

თუ ეს ვარაუდები სწორია და არც ერთ მხარეს ისინი ოფიციალურად არ უარყვია, ახლა ყველაზე მნიშვნელოვანი საკითხი აპელაციის შესახებ სიახლეების მოლოდინია. პრემიერ ლიგის წესების თანახმად, გადაწყვეტილების გამოცხადებიდან „მანჩესტერ სიტის“ აპელაციის შესატანად 14 დღე ექნება, ხოლო შემდგომი პროცესი 12 კვირაზე ნაკლებ დროში უნდა დასრულდეს.

აპელაციის განხილვის შემდეგ, რომელიც არაუმეტეს ხუთი დღის განმავლობაში ერთიან პროცესად უნდა ჩატარდეს და საბოლოო გადაწყვეტილების მიღების შემდეგ, სააპელაციო პანელი ვალდებული იქნება, წერილობით განმარტოს საკუთარი გადაწყვეტილების მიზეზები. ასევე, უნდა გამოქვეყნდეს პირველადი სასამართლო პანელის წერილობითი დასაბუთებაც, თუმცა ამ საქმის უპრეცედენტო მასშტაბის გამო სტანდარტული პროცედურები ყოველთვის არ იყო დაცული და ჯერ უცნობია, როდის გამოქვეყნდება ეს დოკუმენტი.

რა მოხდება, თუ „სიტი“ აპელაციას შეიტანს?

კლუბი აპელაციას მხოლოდ მიღებულ გადაწყვეტილებაზე შეიტანს და არა შესაძლო სასჯელზე, რომელიც ამ ეტაპზე ჯერ განსაზღვრული არ არის.

სასამართლო პანელის დასკვნების გასაჩივრების შემთხვევაში „სიტის“ ახალი მტკიცებულებების წარდგენის შესაძლებლობა ექნება, იმ პირობით, რომ ეს მასალები მანამდე მისთვის ხელმისაწვდომი არ ყოფილა. კლუბს ასევე შეეძლება ახალი ზეპირი არგუმენტების წარდგენა.

აპელაციის განხილვის დასრულების შემდეგ საბოლოო გადაწყვეტილება 30 დღის განმავლობაში უნდა იყოს ცნობილი.

თუ აპელაცია წარუმატებელი აღმოჩნდება, რა მოხდება?

პრემიერ ლიგის W.97 წესის თანახმად, „სააპელაციო საბჭოს გადაწყვეტილება საბოლოოა“, თუმცა ამის შემდეგაც არსებობს კიდევ ერთი სამართლებრივი გზა — არბიტრაჟი.

ამ შემთხვევაში საქმე კიდევ ერთი მაღალი რანგის იურისტებისგან შემდგარი პანელის წინაშე წარდგება, თუმცა არბიტრაჟისთვის საჭირო კრიტერიუმები გაცილებით მკაცრი იქნება. არბიტრაჟის წარმატებით გამოყენება, ძირითადად, მხოლოდ იმ შემთხვევაში იქნება შესაძლებელი, თუ დადგინდება, რომ პირველმა სასამართლო პანელმა ან სააპელაციო საბჭომ სამართლებრივი პროცესი ბოროტად გამოიყენა.

„სიტიმ“ პრემიერ ლიგასთან დაკავშირებული პარტიების ტრანზაქციების წესების გამო ცოტა ხნის წინ უკვე გაიარა საარბიტრაჟო პროცესი. თავდაპირველი გადაწყვეტილების შემდეგ, რომელმაც წესების ორი კონკრეტული გამოყენება სადავოდ მიიჩნია, თუმცა მთლიანობაში მათი კანონიერება დაადასტურა, „სიტიმ“ და პრემიერ ლიგამ შეთანხმებას მიაღწიეს და საქმე სასამართლომდე აღარ მივიდა.

როდის და როგორ დაისჯება „სიტი“?

თუ „სიტი“ გადაწყვეტილების გაუქმებას შეძლებს, რა თქმა უნდა, სანქცია არ დაეკისრება.

თუ კლუბის ყველა აპელაცია წარუმატებელი აღმოჩნდება, სასამართლო პანელს სასჯელის რამდენიმე ვარიანტი ექნება. სანქციები ჯარიმით იწყება და პრემიერ ლიგიდან სრულ გარიცხვამდე მიდის, მათ შორის კი სხვადასხვა სპორტული სასჯელია, მაგალითად, სატურნირო ქულების დაკლება.

ბრალდებების მასშტაბის გათვალისწინებით, თუ აპელაცია წარუმატებელი აღმოჩნდა, „სიტი“ სასჯელის ყველაზე მკაცრი ზომების მიღებას უნდა ელოდოს.

შეიძლება თუ არა დაქვეითება საქმის დასასრული აღმოჩნდეს?

გავრცელებული ინფორმაციით, პრემიერ ლიგის კლუბები და ის გუნდები, რომლებიც ამ პერიოდში უმაღლესი დივიზიონიდან დაქვეითდნენ, უკვე აფასებენ შესაძლო ფინანსურ ზარალს, რომელიც მათ იმ პერიოდში მიადგათ, როდესაც „სიტი“ ჩემპიონატში წარმატებით ასპარეზობდა და, არსებული ბრალდებების მიხედვით, წესებს არღვევდა.

დიდი ალბათობით, ამას სასამართლო დავების ახალი ტალღა მოჰყვება. მაგალითად, „მანჩესტერ იუნაიტედი“ 2017/18 წლების სეზონში „სიტის“ მეორე ადგილზე ჩამორჩა და შესაძლოა, ამ პროცესში კლუბს პრემიერ ლიგის რეკორდული, 21-ე ტიტულის მოპოვების შესაძლებლობა წაერთვა.

ასევე შესაძლებელია, რომ იმ კლუბებმა, რომლებიც იმ პერიოდში პრემიერ ლიგიდან დაქვეითდნენ, იდავონ, რომ მათი დაქვეითება „სიტის“ მიერ მოპოვებული და შემდგომში სადავოდ ქცეული ქულების გამო მოხდა.

პრემიერ ლიგის კლუბებს, სავარაუდოდ, სასამართლო დავების მიმართ ინტერესი მას შემდეგ შეუმცირდათ, რაც გასულ სეზონში კონკურსს იურიდიულმა პროცესებმა დაახლოებით 50 მილიონი ფუნტი დაუჯდა. თუმცა, თუ „სიტის“ წინააღმდეგ ამ კვირაში ცნობილი გადაწყვეტილება საბოლოოდ ძალაში დარჩება, დიდი ალბათობით, სასამართლო დავების ახალი ტალღა დაიწყება.