მუსიალას კონტრაქტს გაუწყვეტენ? - მისი მომავალი კითხვის ნიშნის ქვეშ არის

„ბაიერნმა“ ჯამალ მუსიალას საკონტრაქტო მომავალთან დაკავშირებით ეჭვები გამოთქვა. კლუბის საპატიო პრეზიდენტმა, ული ჰიონესმა, ღიად დააყენა საკითხი, გააგრძელებს თუ არა ახალგაზრდა ვარსკვლავი მიუნხენურ გუნდში ასპარეზობას.

ხელმძღვანელობის განცხადებები ფეხბურთელთან კონტრაქტის შესაძლო შეწყვეტის საკითხსაც აჩენს. ამის მიზეზი კი გაურკვევლობაა, შეძლებს თუ არა გერმანიის ნაკრების წევრი საჭირო სათამაშო დონის შენარჩუნებას.

ული ჰიონესმა ისაუბრა სერიოზულ ფინანსურ და სპორტულ დილემაზე, რომლის წინაშეც კლუბი 23 წლის ფეხბურთელის გამო დგას. მუსიალას 18 სექტემბრის შემდეგ არ უთამაშია.

„მუსიალა რთულ მდგომარეობაშია. მას ისეთი დაავადება აქვს, რომლის განკურნებაც მარტივი არ არის და არ ვიცით, შეძლებს თუ არა ის ძველი სათამაშო დონის დაბრუნებას. რა თქმა უნდა, ხელფასს კვლავ იღებს, მაგრამ წარმოიდგინეთ, რომ „ბაიერნმა“ ახლა მისი კონტრაქტი ეჭვქვეშ დააყენოს და უთხრას: „ის, რისი შეთავაზებაც ახლა შეგიძლია, აღარ შეესაბამება იმას, რაც კონტრაქტით იყო გათვალისწინებული“. სწორედ ასეთი დილემის წინაშე ვდგავართ“,

— განაცხადა ჰიონესმა

ჯანმრთელობის პრობლემა და სამედიცინო გაურკვევლობა

გერმანული კლუბის ხელმძღვანელობის შეშფოთება ფეხბურთელის ჯანმრთელობის მდგომარეობას უკავშირდება.

მუსიალას ნევროლოგიური დარღვევა დაუდგინდა, რომელიც გონების ხანმოკლე დაკარგვის ეპიზოდებს იწვევს. აღნიშნული პრობლემის გამო ფეხბურთელმა წინასასეზონო პერიოდში ორ შეხვედრაში გონება დაკარგა.

მოთამაშეს მუდმივი სამედიცინო მეთვალყურეობა და მედიკამენტების მიღება სჭირდება, რაც მაღალი დონის შეჯიბრებებში მისი გამოსვლის შესაძლებლობებთან დაკავშირებით კითხვებს აჩენს.

კონტრაქტი 2030 წლამდე და კლუბში რეგისტრაციის საკითხი

გერმანელ ტალანტს „ბაიერნთან“ კონტრაქტი 2030 წლის ივნისამდე აკავშირებს, თუმცა მისი მომავალი სრული გაურკვევლობის საგანია.

მუსიალას მიუნხენური კლუბის მაისურით ჩატარებულ 235 მატჩში 71 გოლი აქვს გატანილი და 38 საგოლე გადაცემა შესრულებული. მიუხედავად ამისა, კლუბის ხელმძღვანელობის პოზიციის გამო, მისი მომავალი „ბაიერნში“ სერიოზული კითხვის ნიშნის ქვეშ დგას.