“მისი ბარსელონაში დარჩენის შესაძლებლობა არსებობდა“ - ლაპორტა მესიზე

ჟოან ლაპორტამ „ბარსელონას“ დელეგატთა გენერალური ასამბლეა ლიონელ მესისთვის გზავნილის გასაგზავნად გამოიყენა.

კატალონიური კლუბის პრეზიდენტმა აშკარა კმაყოფილებით დაადასტურა, რომ „ბარსელონას“ არ უთქვამს უარი იდეაზე, საკუთარ ისტორიაში საუკეთესო ფეხბურთელს ღირსეული გამოსამშვიდობებელი ღონისძიება მოუწყოს.

როგორც „Sport“ წერს, ლაპორტამ განაცხადა, რომ „ბარსელონამ“ მესის უკვე შეატყობინა სურვილი, მის პატივსაცემად სპეციალური ღონისძიება მოაწყოს. კლუბს თარიღიც კი აქვს შერჩეული — ახალი სტადიონის სრულად დასრულების შემდეგ.

„მესის ვუთხარით, რომ გვინდა, სტადიონის დასრულების შემდეგ მის პატივსაცემად გამოსამშვიდობებელი ღონისძიება ჩავატაროთ, რომელსაც თითქმის 105 000 მაყურებელი დაესწრება“, — თქვა ლაპორტამ.

მისივე თქმით, საბოლოო გადაწყვეტილება თავად არგენტინელ ვარსკვლავზე იქნება დამოკიდებული.

„მის პატივსაცემად ღონისძიებას მაშინ ჩავატარებთ, როცა სტადიონი სრულად დასრულდება, თუკი თავადაც მოისურვებს ამას“, — დაამატა ლაპორტამ.

„ბარსელონას“ პრეზიდენტმა ასევე ისაუბრა იმის შესაძლებლობაზე, რომ მესის კატალონიური გუნდის მაისური კიდევ ერთხელ მოერგო.

„არსებობდა შესაძლებლობა, რომ ჩვენთან კიდევ ერთი სეზონი გაეტარებინა, თუმცა ასე არ მოხდა, რადგან მან სხვა გადაწყვეტილება მიიღო“, — განმარტა მან და არ დაუკონკრეტებია, რომელ პერიოდს გულისხმობდა.

ლაპორტას ამ სიტყვებმა „ბარსელონას“ გულშემატკივრების იმ ნაწილის მტკივნეული მოგონებები გააცოცხლა, რომლისთვისაც ეს საკითხი დღემდე აქტუალურია. მესიმ კლუბი 2021 წლის ზაფხულში დატოვა და იმ გამოსამშვიდობებელი მატჩის ჩატარება ვერ მოხერხდა, რომელსაც მისი მრავალწლიანი კარიერა „ბარსელონაში“ იმსახურებდა.

თუმცა ლაპორტამ მალევე სცადა შესაძლო დაძაბულობის განმუხტვა და ხაზი გაუსვა კლუბის კეთილგანწყობას ყოფილი კაპიტნის მიმართ.

„ძალიან ბედნიერები ვიქნებით, თუ მის პატივსაცემად გამოსამშვიდობებელ ღონისძიებას ჩავატარებთ. იმედი მაქვს, მას მალე ვნახავ“, — თქვა ლაპორტამ.