Transfermarkt-ის განახლებული მონაცემები | ბართიშვილისა და კვარაცხელიას ღირებულება გაიზარდა

Transfermarkt-მა კრისტალბეთ ეროვნული ლიგის ფეხბურთელების სატრანსფერო ღირებულებები განაახლა.

ყველაზე ძვირადღირებული ფეხბურთელი ანდრია ბართიშვილია, რომლის საბაზრო ღირებულებაც ივნისის მონაცემებთან შედარებით ერთი მილიონი ევროთი გაიზარდა. 17 წლის ბართიშვილს, რომელმაც ცოტა ხნის წინ ლონდონის „არსენალთან“ გააფორმა კონტრაქტი, Transfermarkt-ი 2.5 მილიონ ევროდ აფასებს.

ასევე ერთი მილიონით გაიზარდა 16 წლის თორნიკე კვარაცხელიას საბაზრო ღირებულება - 500 ათასიდან 1.5 მილიონ ევრომდე.

ყველაზე ძვირადღირებული ფეხბურთელების ხუთეულში არიან თბილისის „დინამოს“ 19 წლის განაპირა მცველი გიორგი გვასალია (800 000 ევრო), „იბერიას“ ცენტრალური მცველი ალექსანდრე ამისულაშვილი და მისი თანაგუნდელი ნიკოლოზ დადიანი (ორივე 700 000 ევრო).

პირველ ათეულში ასევე შედიან პაულო ვიტორი (დინამო ბათუმი, 700 000 ევრო), ნოდარ ლომინაძე (ტორპედო, 600 000 ევრო), დავით კერესელიძე (დილა, 600 000 ევრო), იმრან ულად ომარი (დინამო ბათუმი, 600 000 ევრო) და ლევან შენგელია (დინამო ბათუმი, 600 000 ევრო).