რატომ შეუჩერდა დისკვალიფიკაცია ბალოგუნს | ფიფას სადისციპლინო კომიტეტის განმარტება

აშშ-ის ეროვნული ნაკრების ფეხბურთელ, ფოლარინ ბალოგუნთან დაკავშირებით მსოფლიო ფეხბურთის მმართველი ორგანოს, FIFA-ს სადისციპლინო კომიტეტმა განცხადება გაავრცელა.

ცნობისთვის, ფოლარინ ბალოგუნმა ბოსნია და ჰერცეგოვინასთან მატჩში წითელი ბარათი მიიღო და ბელგიასთან არ უნდა ეთამაშა, მაგრამ მას დისკვალიფიკაცია პირობითი სასჯელით შეუცვალეს და ბელგიის წინააღმდეგ თამაშის უფლება დართეს. ბელგიურმა მხარემ ეს გადაწყვეტილება გაასაჩივრა, თუმცა FIFA-მ ეს აპელაცია დაუშვებლად ცნო. ამის შემდეგ აშშ-ის პრეზიდენტმა, დონალდ ტრამპმა საჯაროდ განაცხადა, რომ ბალოგუნის დისკვალიფიკაციის შეცვლა მისი დამსახურებაა, რაც FIFA-ს პრეზიდენტმა, ჯანი ინფანტინომ უარყო. ბალოგუნმა მერვედფინალში ბელგიის წინააღმდეგ ითამაშა, თუმცა როგორც მისთვის, ასევე აშშ-ის ეროვნული გუნდისთვის, ბელგიასთან მატჩი წარუმატებელი იყო, პოჩეტინოს გუნდი 1:4 დამარცხდა.

ფიფას სადისციპლინო კომიტეტის თავმჯდომარის განცხადება - 6 ივლისი, 2026

7 ივლ 2026, 01:05 (+04)

1. 2026 წლის 1 ივლისს, 2026 წლის ფიფას მსოფლიო ჩემპიონატის™ (FIFA World Cup 2026™) აშშ-ისა და ბოსნია-ჰერცეგოვინას მატჩის დროს, აშშ-ის ნაკრების ფეხბურთელი ფოლარინ ბალოგუნი 64-ე წუთზე VAR-ის (ვიდეო ასისტენტ რეფერის) გადამოწმების შემდეგ, უხეში თამაშის გამო წითელი ბარათით გააძევეს. მატჩის შემდეგ, გაძევების მიუხედავად, იგი მოედანზე შევიდა, რათა გამარჯვება თანაგუნდელებთან ერთად აღენიშნა.

2. 2026 წლის 2 ივლისს, ფიფამ ბალოგუნის წინააღმდეგ სადისციპლინო წარმოება დაიწყო ფიფას სადისციპლინო კოდექსის 66-ე (წითელ ბარათთან დაკავშირებული გაძევება და მატჩის გამოტოვება) და მე-14 (ფეხბურთელთა არასათანადო ქცევა ზეიმთან დაკავშირებით) მუხლების შესაძლო დარღვევის გამო.

3. 2026 წლის 5 ივლისს, ფიფას სადისციპლინო კომიტეტმა ბალოგუნი ორივე დარღვევაში დამნაშავედ ცნო, დააკისრა ერთმატჩიანი დისკვალიფიკაცია (რომელიც პირობითად, ერთწლიანი გამოსაცდელი ვადით შეჩერდა) და 40,000 აშშ დოლარის ოდენობის ჯარიმა, რის შესახებაც აცნობა მხარეებს.

4. სპორტულ სანქციასთან დაკავშირებით, ფიფას სადისციპლინო კომიტეტმა ერთმატჩიანი დისკვალიფიკაცია დააწესა. გადაწყვეტილებაში კონკრეტულად იყო აღნიშნული, რომ ეს სასჯელი მოიცავდა ავტომატურ დისკვალიფიკაციას, რომელიც სხვა შემთხვევაში უნდა მოხდილიყო ფიფას მსოფლიო ჩემპიონატის მომავალ მატჩში: აშშ ბელგიის წინააღმდეგ (დაგეგმილი 2026 წლის 6 ივლისს). პრაქტიკულად, ფიფას სადისციპლინო კომიტეტის მხრიდან რაიმე დამატებითი ზომის მიღების გარეშე, ბალოგუნს ამ მატჩში მონაწილეობის უფლება არ ექნებოდა.

5. თუმცა, ფიფას სადისციპლინო კომიტეტმა იხელმძღვანელა ფიფას სადისციპლინო კოდექსის 27-ე მუხლით, რომლის მიხედვითაც მას აქვს დისკრეცია, შეაჩეროს ნებისმიერი სადისციპლინო ზომის აღსრულება და დაადგინა, რომ ერთმატჩიანი დისკვალიფიკაციის აღსრულება შეჩერდეს ერთწლიანი გამოსაცდელი ვადით. შედეგად, ბალოგუნს არ მოეთხოვება დისკვალიფიკაციის დაუყოვნებლივ მოხდა. ამის ნაცვლად, სანქცია გამოსაცდელი პერიოდის განმავლობაში უმოქმედო რჩება და ამოქმედდება მხოლოდ იმ შემთხვევაში, თუ იგი ამ ერთწლიანი პერიოდის განმავლობაში მსგავსი ხასიათისა და სიმძიმის სხვა დარღვევას ჩაიდენს. თუ ასეთი შემდგომი დარღვევა მოხდება, შეჩერებული ერთმატჩიანი აკრძალვა ძალაში შევა იმ ახალ სანქციასთან ერთად, რომელიც მოგვიანებით ჩადენილი არასათანადო ქცევისთვის დაწესდება.

6. შეჩერებული მატჩის აკრძალვის გარდა, ფიფას სადისციპლინო კომიტეტმა დააკისრა ჯარიმა 40,000 აშშ დოლარის ოდენობით, თანხის ნახევარი განაწილდა ფიფას სადისციპლინო კოდექსის მე-14 მუხლის დარღვევისთვის, ხოლო მეორე ნახევარი — ფიფას სადისციპლინო კოდექსის 66-ე მუხლის დარღვევისთვის. აშშ-ის ფეხბურთის ფედერაცია გამოცხადდა სოლიდარულად პასუხისმგებლად ჯარიმის გადახდაზე, ფიფას სადისციპლინო კოდექსის 6.5 მუხლის შესაბამისად.

7. პირველ რიგში, ფიფას სადისციპლინო კომიტეტი (ისევე, როგორც ფიფას ნებისმიერი სხვა სასამართლო ორგანო) დამოუკიდებელია, როგორც ამას ითვალისწინებს ფიფას წესდება და ფიფას სადისციპლინო კოდექსი. ფიფას სასამართლო ორგანოების თავმჯდომარეები, თავმჯდომარის მოადგილეები და სხვა წევრები აკმაყოფილებენ დამოუკიდებლობის კრიტერიუმებს, რომლებიც განსაზღვრულია ფიფას მმართველობის რეგულაციებში, რათა უზრუნველყოფილი იყოს მათი მიუკერძოებლობა.

8. მეორეც, ფიფას სადისციპლინო კომიტეტს არ გაუუქმებია მოედანზე მსაჯის მიერ ბალოგუნის გაძევების გადაწყვეტილება. პირიქით, ფიფას სადისციპლინო კომიტეტმა ძალაში დატოვა ბალოგუნის ერთმატჩიანი დისკვალიფიკაცია იმ წითელი ბარათის შედეგად, რომელიც მას 2026 წლის 1 ივლისს უჩვენეს. ფიფას სადისციპლინო კომიტეტმა გადაწყვეტილება მიიღო მხოლოდ იმ შემდგომ სადისციპლინო სანქციებზე, რომლებიც წითელი ბარათის შემდეგ უნდა დაწესებულიყო.

9. ფიფას სადისციპლინო კოდექსის 66.4 მუხლში ნათქვამია, რომ „გაძევება ავტომატურად იწვევს დისკვალიფიკაციას მომდევნო მატჩში“. ანალოგიურად, ფიფას მსოფლიო ჩემპიონატი 26™-ის რეგულაციების 10.5 მუხლი ადგენს, რომ „თუ ფეხბურთელი ან გუნდის ოფიციალური პირი გაძევებულია პირდაპირი ან ირიბი წითელი ბარათის (მეორე გაფრთხილება) შედეგად, ის ავტომატურად გამოტოვებს თავისი გუნდის მომდევნო მატჩს. გარდა ამისა, შესაძლოა დაწესდეს დამატებითი სანქციები“.

10. ფიფას სადისციპლინო კოდექსის (FDC) 27-ე მუხლის შესაბამისად, ფიფას სადისციპლინო კომიტეტმა გადაწყვიტა, ერთი (1) წლის გამოსაცდელი ვადით შეეჩერებინა ფიფას სადისციპლინო კოდექსის 66.4 მუხლისა და მსოფლიო ჩემპიონატი 26™-ის რეგულაციების 10.5 მუხლის საფუძველზე დაწესებული ავტომატური მატჩის დისკვალიფიკაციის აღსრულება. აღსრულების აღნიშნული შეჩერება გადაწყდა ინციდენტის გარშემო არსებული ყველა კონკრეტული გარემოებისა და ხელმისაწვდომი მტკიცებულების გათვალისწინებით.

11. ფიფას სადისციპლინო კოდექსის 27-ე მუხლის თანახმად, ფიფას სადისციპლინო კომიტეტს აქვს დისკრეცია, შეაჩეროს ნებისმიერი სადისციპლინო ზომის აღსრულება, თუკი ისინი არ უკავშირდება მატჩების მანიპულაციას — რაც, რა თქმა უნდა, აქ არ მომხდარა. უნდა დაემატოს, რომ 27-ე მუხლის გამოყენება არ არის უპრეცედენტო, რადგან მსგავსი გადაწყვეტილებები ადრეც ყოფილა მიღებული ფიფას 2026 წლის მსოფლიო ჩემპიონატის საკვალიფიკაციო ეტაპის მსვლელობისას.

12. ფიფას სადისციპლინო კოდექსსა და ფიფას მსოფლიო ჩემპიონატი 26™-ის რეგულაციებში არ არსებობს დებულებები, რომლებიც კრძალავს ფიფას სადისციპლინო კომიტეტის მიერ სადისციპლინო კოდექსის 27-ე მუხლით გათვალისწინებული დისკრეციის განხორციელებას. მსგავსი დისკრეციის გამოყენება სრულად შეესაბამება გამოსაყენებელი სადისციპლინო სანქციის განსაზღვრის ზოგად სახელმძღვანელო პრინციპებს, ფიფას სადისციპლინო კოდექსის 25-ე მუხლის თანახმად.

13. ფეხბურთში წითელი ბარათების სამართლებრივი შედეგების გადახედვა თანამედროვე თამაშში ახალი არ არის. მაგალითად, უეფასთან აფილირებული წევრი ასოციაციების უმაღლესი ლიგების უმრავლესობაში – წითელი ბარათების გაუქმება ჩვეულებრივი სადისციპლინო ზომაა და ამას არასდროს გამოუწვევია შეშფოთება რაიმე „წითელი ხაზის“ გადაკვეთის თაობაზე. და კიდევ ერთხელ ხაზგასმით უნდა აღინიშნოს, რომ განსახილველ გადაწყვეტილებაში წითელი ბარათი არ გაუქმებულა. შესაბამისი რეგულაციების მკაფიო დებულებაზე დაყრდნობით წითელი ბარათის ეფექტების შეჩერება გაცილებით უფრო დაბალანსებული ზომაა.

 

ამ თემაზე ასევე შეგიძლიათ იხილოთ უეფას განცხადება (იხილეთ).