უეფა ბალოგუნის შესახებ: გამოვხატავთ უნდობლობას გადაწყვეტილების მიმართ, მან ზღვარი გადაკვეთა

უეფამ ფოლარინ ბალოგუნის გარშემო შექმნილ სიტუაციასთან დაკავშირებით განცხადება გამოაქვეყნა.

მანამდე გავრცელდა ინფორმაცია, რომლის თანახმადაც აშშ-ის პრეზიდენტის ადმინისტრაციამ ქვეყნის ნაკრების დისკვალიფიკაციის საკითხზე ფიფა-ს მიმართა.

„გუშინდელმა გადაწყვეტილებამ, მოთამაშე ფოლარინ ბალოგუნზე გაცემული წითელი ბარათის შემდეგ ავტომატური ერთმატჩიანი დისკვალიფიკაციის ერთწლიანი გამოსაცდელი ვადით შეჩერების შესახებ, ზღვარს გადააბიჯა. ფეხბურთი, ისევე როგორც ნებისმიერი სხვა სპორტის სახეობა, ეყრდნობა წესებს, რომლებიც პატიოსანი, გამჭვირვალე და სამართლიანი კონკურენციის საფუძველია. ზოგჯერ წესები სხვადასხვაგვარი ინტერპრეტაციის საშუალებას იძლევა. მოცემულ შემთხვევაში ეს ასე არ არის. წითელი ბარათის შემდეგ მინიმალური ავტომატური ერთმატჩიანი დისკვალიფიკაცია დისკრეციულ უფლებას არ წარმოადგენს და კომპეტენტური ორგანოს მხრიდან გადაწყვეტილების მიღებას არ საჭიროებს. ეს რეგლამენტში ჩადებული პრინციპია, რომელზეც გამონაკლისები არ შეიძლება დაიშვას, მით უმეტეს ტურნირის შუაგულში, სადაც რამდენიმე სხვა მოთამაშე ანალოგიურ სიტუაციაში აღმოჩნდა და საკუთარი დისკვალიფიკაცია მოიხადა. როდესაც წესების ურყევობა მათი დაცვით არ უზრუნველყოფა, თამაშის მთლიანობა საფრთხის ქვეშ დგება და შეჯიბრებების მიმართ ნდობა ირყევა. ანალოგიურად, ასეთი გადაწყვეტილება მიმდინარე ტურნირზე პრეცედენტს ქმნის, სადაც მსგავსი სიტუაციები ახლა თანაბარ მოპყრობას მოითხოვს, რაც შეჯიბრებას ზიანს მიაყენებს. ფეხბურთი მსოფლიოში ყველაზე საყვარელი სპორტის სახეობაა, რადგან ის ლამაზი თამაშია, და მას ენდობიან, რადგან ყველა ქვეყანაში ერთი და იმავე წესებით თამაშობენ. არცერთი ტურნირი არ არის დამოუკიდებელი მოვლენა და, თუ საუბარია მსოფლიო ჩემპიონატზე, მას თამაშზე მთლიანობაში როგორც დადებითი, ასევე უარყოფითი გავლენის მოხდენა შეუძლია. ჩვენ გამოვხატავთ ჩვენს უნდობლობას ასეთ უპრეცედენტო, გაუგებარ და გაუმართლებელ გადაწყვეტილებასთან დაკავშირებით“, — ნათქვამია უეფას განცხადებაში.

შეგახსენებთ, რომ „მონაკოს“ ფეხბურთელმა მსოფლიო ჩემპიონატის 1/16-ფინალში, ბოსნიასთან მატჩში (2:0), ტარიკ მუჰარემოვიჩის კოჭზე ფეხის დაბიჯების გამო, VAR-ზე გადამოწმების შემდეგ წითელი ბარათი მიიღო და მას ბელგიასთან 1/8-ფინალური დაპირისპირება უნდა გამოეტოვებინა.

მოგვიანებით ბალოგუნის ერთმატჩიანი დისკვალიფიკაცია ერთწლიანი გამოსაცდელი ვადით ჩანაცვლდა. ახლა აშშ-ის ფორვარდი 1/8-ფინალში ბელგიის წინააღმდეგ თამაშს შეძლებს.