სინერი რეკორდებით ფინალში გავიდა - 32 სეტი და 16 მატჩი
იანიკ სინერი მაიამის საჩოგბურთო მასტერსის ფინალში ითამაშებს. ტურნირის ნახევარფინალურ ეტაპზე იტალიელმა ჩოგბურთელმა გერმანელი ალექსანდრ ზვერევი ორ სეტში 6:3, 7:6 დაამარცხა და გადამწყვეტ შეხვედრაში მონაწილეობის უფლება მოიპოვა, სადაც მისი მეტოქე ჩეხი ირჟი ლეჰეჩკა იქნება.
ზვერევისა და სინერის შეხვედრა 1 საათსა 52 წუთს გაგრძელდა. ამ დროის განმავლობაში იანიკმა 15 ეისი შეასრულა, არც ერთი ორმაგი შეცდომა არ დაუშვია და ოთხიდან ერთი ბრეიკ-პოინტის რეალიზება შეძლო. რაც შეეხება გერმანელ ჩოგბურთელს, ზვერევის ანგარიშზე 5 ეისი და 1 ორმაგი შეცდომა იყო, ორი ბრეიკ-პოინტიდან კი მან ვერც ერთი ვერ გამოიყენა.
ცნობისათვის, მასტერსებზე იანიკ სინერს ზედიზედ 16-მატჩიანი და 32-სეტიანი წაუგებელი სერია აქვს, მთლიანობაში ყველა ტურნირზე გამართული უკანასკნელი 35 შეხვედრიდან კი 33 მისი გამარჯვებით დასრულდა.
