46 უნებლიე შეცდომა | ბასილაშვილი მაიამის მასტერსს გამოეთიშა

ნიკოლოზ ბასილაშვილი მაიამის მასტერსს გამოეთიშა. პირველ წრეში ქართველი ჩოგბურთელი მარიანო ნავონეს დაუპირისპირდა და მსოფლიოს 61-ე ჩოგანთან ორ სეტში დამარცხდა — 6:7(7:9), 3:6.

პირველი სეტის დიდი ნაწილი თანაბარ ბრძოლაში წარიმართა და ჩოგბურთელები თავიანთ მოწოდებაზე უშეცდომოდ თამაშობდნენ. 5:4-ზე ბასილაშვილს ორმაგი სეტპოინტი ჰქონდა, მაგრამ ვერც ერთი გამოიყენა და საქმე ტაიბრეიკამდე მივიდა.

ტაიბრეიკზე ნიკოლოზმა 3 სეტპოინტი მიიღო, მაგრამ პარტია ვერ დახურა და 7:9 დამარცხდა. მეორე სეტში გადამწყვეტი მერვე გეიმი აღმოჩნდა. 3:4-ზე ქართველმა ჩოგბურთელმა საკუთარი მოწოდება წააგო და ტურნირს გამოეთიშა.

ნავონესთან მატჩში ბასილაშვილის მთავარი პრობლემა უნებლიე შეცდომები იყო. ნიკომ 46! უნებლიე შეცდომა დაუშვა, როცა მის მეტოქეს მხოლოდ 15 ჰქონდა. ნიკოლოზმა 5-დან ვერც ერთი ბრეიკპოინტი ვერ გამოიყენა, არგენტინელს კი ბრეიკის შანსი ერთხელ ჰქონდა და მიზანს მიაღწია.