ბოლო სეტს 2:4-ს აგებდა და ზედიზედ 4 გეიმი აიღო | ეკო გორგოძის გამარჯვება თურქეთში

თურქეთში, ანტალიის მესამე ჩელენჯერის 1/16-ფინალში ეკო გორგოძე მსოფლიოს 135-ე ჩოგანს, არანტა რუსს დაუპირისპირდა. ქართველმა ჩოგბურთელმა მომდევნო ეტაპის საგზური მოიპოვა და მეტოქე სამ სეტში დაამარცხა — 7:6(3), 3:6, 6:4.

პირველ სეტში ჩოგბურთელებს თავიანთი მოწოდებების აღება უჭირდათ და საწყის 10 გეიმში 8 ბრეიკი ვიხილეთ. პირველი სეტის გამარჯვებულის გამოსავლენად ტაიბრეიკი დაინიშნა, რომელიც გორგოძემ 7:3 მოიგო.

მეორე პარტია რუსმა კარგად დაიწყო და 4:1 დაწინაურდა. ეკომ ბრეიკი შეასრულა, თუმცა ნიდერლანდელმა უკუბრეიკით უპასუხა და სეტი 6:3 მოიგო. გადამწყვეტი სეტი რუსის უპირატესობით დაიწყო. არანტა 4:2-ს იგებდა, თუმცა გორგოძემ მებრძოლი ხასიათი გამოავლინა და ზედიზედ ოთხი გეიმი მოიგო — 6:4.

გორგოძე მომდევნო ეტაპზე ანჰელინა კალინინასა და ელენა პრიდანკინას შორის გამარჯვებულს დაუპირისპირდება. მათი შეხვედრა 11 მარტს გაიმართება.