„შურისძიება მწყურია“ - ჰოლოუეიმ თოფურია გაიხსენა
რამდენიმე კვირაში BMF-ის ქამრისთვის UFC-ის მსუბუქ წონით დივიზიონში მაქს ჰოლოუეი და ჩარლზ ოლივეირა დაუპირისპირდებიან. უმნიშვნელოვანესი ორთაბრძოლის წინ, „დალოცვილს“ არამხოლოდ ბრაზილიელ მეტოქეზე, არამედ მის სამომავლო გეგმებზეც უსვამენ შეკითხვებს და ერთ-ერთი ინტერვიუს დროს, როდესაც საუბარი ილია თოფურიაზე ჩამოვარდა, ჰოლოუეიმ ასეთი განცხადება გააკეთა:
„მინდა თუ არა ილია თოფურიაზე შურისძიება? ჩემთვის იდეალური იქნება, თუ ჩარლზ ოლივეირას მაქსიმალურად ეფექტურ სტილში დავამარცხებ და მერწმუნეთ, ამას უპირობოდ გავაკეთებ, შემდეგ კი ილიას BMF-ის ქამრისთვის და ტიტულისთვის დავუპირისპირდები. ჩვენი ბრძოლის შემდეგ თოფურია საუბრობდა, რომ BMF-ის ქამარი მისი გახდა, არადა ჩვენი დაპირისპირების დროს სასწორზე ეს ტიტული არ იდო. ამის გამო ილია ჩემზე არ უნდა გაბრაზდეს, გაუბრაზდეს UFC-ის ხელმძღვანელებს“.
შეგახსენებთ, რომ ილია თოფურიასა და მაქს ჰოლოუეის დაპირისპირება 2024 წლის ოქტომბერში შედგა და „ელ მატადორი“ გახდა პირველი მებრძოლი, რომელმაც მაქსი ნოკაუტში გაგზავნა.
