შერმადინი მატჩის MVP გახდა - ტენერიფე ტრაპანისთან დამარცხდა
საკალათბურთო ჩემპიონთა ლიგის ჯგუფურ ეტაპზე ლაგუნა ტენერიფემ ტრაპანის უმასპინძლა და მძიმე ბრძოლაში 80:83 დამარცხდა.
თავდაპირველად გიორგი შერმადინი სათადარიგოთა სკამზე მოგევლინა, თუმცა მსუყე სტატისტიკა მაინც შემოგვთავაზა.
ქართველმა კალათბურთელმა პარკეტზე 23 წუთი და 17 წამი გაატარა. ამ პერიოდის განმავლობაში მან 13 ქულას, 9 მოხსნას და 1 შედეგიან გადაცემას მოუყარა თავი. ორმაგ დუბლამდე მხოლოდ ერთი მოხსნა დააკლდა. გიორგი ამ შედეგით მატჩის MVP გახდა.
???? @gioshermadini es el MVP aurinegro en el encuentro de hoy
— La Laguna Tenerife (@CB1939Canarias) December 10, 2025
???? By @costa_adeje pic.twitter.com/npREXFBD7v
შერმადინმა 8-ჯერ სცადა 2-ქულიანის ჩაგდება და 6 ჩააგდო. 1 საჯარიმო ტყორცნა შეასრულა და ისიც ზუსტად.
ვეტერანმა კალათბურთელმა 9 მოხსნიდან 5 საკუთარ ფარზე შეასრულა, 4 კი მეტოქის. ჯამში გიორგიმ 2 პერსონალური ფოლი მიიღო.
ცნობისთვის, მიმდინარე სეზონში ტენერიფე ჩემპიონთა ლიგაზე პირველად დამარცხდა. მიუხედავად წაგებისა, შერმადინის გუნდი 9 ქულით ჯგუფის ლიდერია.
