ბოლოადგილოსანმა 3:0 დაამარცხა | ლოჩოშვილი მეორე გოლისას შეცდა

გერმანიის ბუნდესლიგა 2-ის ბოლოადგილოსანმა „მაგდებურგმა’’ შინ მიროსლავ კლოზეს გაწვრთნილი „ნიურნბერგი’’ 3:0 დაამარცხა. 76-ე წუთზე, როცა ანგარიში 1:0 იყო, „ნიურნბერგი’’ 10 ფეხბურთელით დარჩა და მატჩის ბოლომდე რიცხვობრივ უმცირესობაში ითამაშა.

„ნიურნბერგის’’ სასტარტო შემადგენლობაში ლუკა ლოჩოშვილმა შეუცვლელად ითამაშა. ქართველი მცველი მეორე გოლის ეპიზოდში შეცდა. შემტევმა, რომელიც ლუკას უნდა განეიტრალებინა, გოლი გაიტანა.

შეგახსენებთ, გერმანიის ბუნდესლიგა 2-ის მე-13 ტურში ლუკა ლოჩოშვილის „ნიურნბერგი“ „არმინიას“ დაუპირისპირდა. ქართველი უკანახაზელის გუნდმა 2:0 იმარჯვა და „ლოჩო“ დაცვაში ერთ-ერთ საუკეთესო იყო, რაც შეუმჩნეველი არ დარჩენილა. ავტორიტეტულმა გერმანულმა გამოცემამ Kicker-მა ლუკა მე-13 ტურის სიმბოლურ ნაკრებში შეიყვანა. Kicker-ის ვერსიით, ქართველი მცველი ტოპ 11 ფეხბურთელს შორის პირველად მოხვდა და ერთადერთია „ნიურნბერგიდან“, რომელიც აღნიშნულ ტურში გამოარჩიეს.

14 ტურში „ნიურნბერგმა'' 18 ქულა დააგროვა, მე-9 ადგილზეა.