ალისონის წასვლის დრო დადგა - კარაგერის მოსაზრება

„ლივერპულის“ ბოლოდროინდელი ასპარეზობა ვერანაირ კრიტიკას ვერ უძლებს, რის გამოც კლუბის ხელმძღვანელებმა არნე სლოტს სიტუაციის გამოსასწორებლად ორმატჩიანი ვადა მისცეს. როგორც ინგლისური მედია იუწყება, თუ „წითლები“ „ვესტ ჰემთან“ და „სანდერლენდთან“ დადებითი შედეგის მიღწევას ვერ შეძლებენ, ნიდერლანდელ დამრიგებელს კარისკენ მიუთითებენ.

მერსისაიდელთა ყოფილი ფეხბურთელი ჯეიმი კარაგერი, რომელიც ამჟამად სატელევიზიო ექსპერტად მუშაობს, თვლის, რომ პრობლემა მხოლოდ მწვრთნელში არ არის და დრო მოვიდა ლიდერებმა წასვლაზე იფიქრონ, რაზეც მან დეტალურად ისაუბრა:

„ბევრი არ მეთანხმება, მაგრამ შესაძლოა მოჰამედ სალაჰის, ვირჯილ ვან დაიკისა და ალისონის წასვლა „ლივერპულის“ ნათელი მომავლისთვის უმჯობესიც იყოს. 2018 წელს იურგენ კლოპის ხელმძღვანელობით გუნდი დიდ გზას დაადგა, შვიდი წლის შემდეგ კი არნე სლოტი მოვიდა, რომლის ბრალიც შეიძლება დღევანდელი წარუმატებლობა ბოლომდე არ იყოს.

სალაჰი-ვან დაიკი-ალისონის ტრიო მისვლისთანავე „ლივერპულის“ წარმატების ფუნდამენტი იყო და რას ვხედავთ ახლა? ალისონი ლამის სულ ტრავმირებულია და პრაქტიკულად თამაში არ უწევს. ვუყურებ ვირჯილს და აშკარად არ არის ის, ვინც ადრე იყო. რამდენიმე წლის წინ ვან დაიკი თანაგუნდელებს აზღვევდა და ეხმარებოდა, ახლა კი თავად საჭიროებს დახმარებას.

სალაჰზე ცალკე უნდა ვთქვა. არ მიყვარს, როდესაც ვაკრიტიკებ, რადგან ვფიქრობ, ბოლო დროს მისი მისამართით გამოთქმული საყვედურები ზედმეტად მკაცრია. მოჰამედისგან მხოლოდ იმას ვითხოვ, მისცეს მედიის წარმომადგენლებს ხშირად ინტერვიუ, გაესაუბროს გულშემატკივრებს, აუხსნას რა ხდება გასახდელში და რა კეთდება მძიმე ვითარების გამოსასწორებლად“.

შეგახსენებთ, რომ 12 ტურში დაგროვებული 18 ქულით „ლივერპული“ პრემიერლიგის სატურნირო ცხრილში მეთორმეტე ადგილზეა. მომდევნო შეხვედრას მერსისაიდელები სტუმრად „ვესტ ჰემთან“ ჩაატარებენ, რომელიც ხვალ, თბილისის დროით 18:00 საათზე დაიწყება.