„ნამდვილი ეკალი ლეჩეს დაცვისთვის“ | იტალიური პრესა კვერნაძეს თამაშს გამოეხმაურა

იტალიის სერია A-ს მეცხრე ტურში გიორგი კვერნაძის „ფროზინონემ“ „ლეჩე“ 5:1 გაანადგურა. ქართველი მარცხენა გარემარბი ბრწყინვალე იყო — ორი საგოლე გადაცემა მიითვალა, პენალტი მოიპოვა და Sofascore-მა მისი თამაში 9.4 ქულით შეაფასა. ცნობილი სტატისტიკური სააგენტოს გარდა, კვერნაძის შესანიშნავი გამოსვლა იტალიური პრესის ყურადღების ცენტრშიც მოექცა.

Tuttofrosinone: „პენალტი მოიპოვა და თავისი სისწრაფის წყალობით, მეტოქე გუნდს პრობლემებს უქმნიდა. გოლს ოდნავ ჯიუტად ეძებდა, თუმცა ორი საგოლე გადაცემა მიითვალა“.

Tuttomercatoweb: „ნამდვილი ეკალი „ლეჩესთვის“ მარცხენა ფლანგზე. მას შეუძლია, სისწრაფის ხარჯზე შეტევები განავითაროს. ორი საგოლე გადაცემა მიითვალა“.

Oggi Sport Notizie: „გუნდს სისწრაფესა და არაპროგნოზირებადობას სძენს. ცდილობს, მეტოქე გუნდის მცველების მიერ დატოვებული სივრცეები აითვისოს“.

Fantacalcio: „გიორგი კვერნაძემ საოცარი გამოსვლა აჩვენა. ქართველი გარემარბი მეტოქე გუნდის მცველებს პრობლემებს უქმნიდა, შეტევებში „ფროზინონესთვის“ უპირატესობა მოჰქონდა და ორი საგოლე გადაცემა მიითვალა“.

Eurosport: „ამ სეზონში უკეთესი თამაშებიც ჰქონია. არ ვამბობთ, რომ პასიური იყო, პირიქით — ის ხშირად გახლდათ „ფროზინონეს“ შეტევების ეპიცენტრში, უბრალოდ სხვა შემთხვევებში მეტი ცივსისხლიანობა გამოუჩენია. შეეძლო გოლი გაეტანა, თუმცა ვლადიმირო ფალკონემ აჯობა. კვერნაძემ რეაბილიტაცია მოახდინა და პენალტი მოიპოვა, რომლის შემდეგაც ანგარიში 2:0 გახდა. ორი საგოლე გადაცემა მიითვალა და ერთადერთი, რაც აკლდა, გოლი იყო“.

შეგახსენებთ, რომ კვერნაძის „ფროზინონე“ 17 ქულით სატურნირო ცხრილის მეექვსე ადგილს იკავებს. გიორგის იტალიის ჩემპიონატში 3 გოლი და 3 საგოლე გადაცემა აქვს გაკეთებული. მისი გუნდი მომდევნო შეხვედრას პირველ ნოემბერს, „ტორინოს“ წინააღმდეგ გამართავს.