მექვაბიშვილს კარგი მომენტი ჰქონდა | კრაიოვამ 3-მატჩიანი მოუგებელი სერია შეწყვიტა

რუმინეთის სუპერლიგის მე-17 ტურში ანზორ მექვაბიშვილის „კრაიოვა“ „არგესს“ დაუპირისპირდა. ქართველი ფეხბურთელის გუნდმა 3-მატჩიანი მოუგებელი სერია შეწყვიტა და სტუმრად გამართულ შეხვედრაში 2:1 იმარჯვა.

ანგარიში „კრაიოვამ“ გახსნა — 33-ე წუთზე სტეფან ბაიარამმა გაიტანა. მასპინძლებმა 5 წუთში რიკარდო მატოშის გოლით გაათანაბრეს, თუმცა 43-ე წუთზე „კრაიოვამ“ კიდევ ერთი ბურთი შეაგდო და საბოლოოდ ტაიმიც და თამაშიც მოიგო.

მექვაბიშვილმა კარგი მატჩი ჩაატარა და გოლის გატანის შანსიც ჰქონდა. 55-ე წუთზე ანზორმა ბურთი ხელსაყრელ პოზიციაში მიიღო, თუმცა მისი დარტყმა არაზუსტი აღმოჩნდა. მანამდე, 28-ე წუთზე, მექვაბიშვილი საგოლე გადაცემასთან იყო ახლოს — მისი ჩაწოდების შემდეგ „არგესის“ მეკარემ შეცდომა დაუშვა, მაგრამ სტუმართა დარტყმა არაზუსტი გამოვიდა.

რაც შეეხება მექვაბიშვილის სტატისტიკას, მან 56-დან 48 ზუსტი გადაცემა გააკეთა, ბურთს 71-ჯერ შეეხო, 5-დან 3 ორთაბრძოლა მოიგო, ბურთი ოთხჯერ დაიბრუნა და 1 სახიფათო მომენტი შექმნა. Sofascore-მა მისი თამაში 7.2 ქულით შეაფასა.

„კრაიოვას“ 32 ქულა აქვს და სატურნირო ცხრილში მესამე პოზიციას იკავებს. მექვაბიშვილი და მისი გუნდი ლიდერ „რაპიდ ბუქარესტს“ მხოლოდ სამი ქულით ჩამორჩებიან.