შანსი გიორგისთვის | ქოჩორაშვილის კონკურენტმა ტრავმა მიიღო

გიორგი ქოჩორაშვილის კონკურენტმა, ჟოაუ სიმოეშმა ტრავმა მიიღო. ახალგაზრდა ფეხბურთელი პორტუგალიის 21-წლამდე ნაკრებში იმყოფებოდა და მარცხენა ფეხი დაიზიანა, რის შემდეგაც „სპორტინგში“ დაბრუნება მოუწია.

A Bola-ს ინფორმაციით, ტრავმა სერიოზული არ უნდა იყოს, თუმცა „ლომები“ აპირებენ, მაქსიმალური სიფრთხილე გამოიჩინონ. Leonino-ს მიხედვით, სიმოეშის არყოფნაში ქოჩორაშვილი შანსს მიიღებს და ძირითად შემადგენლობაში იასპარეზებს.

„ქოჩორაშვილს ოქროს შანსი მიეცემა. ქართველი ფეხბურთელი ახალ ცხოვრებას იწყებს და თეთრ-მწვანეების ნახევარდაცვაში იასპარეზებს. სიმოეშის ტრავმის გამო, გიორგი რუი ბორჟესის მეორე ნომერი გახდება და პორტუგალიის თასზე ითამაშებს“, – წერს პორტუგალიური გამოცემა.

ცნობისთვის, „სპორტინგი“ მომდევნო შეხვედრას 22 ნოემბერს გამართავს. თბილისის დროით 22:00-ზე „ლომები“ „მარინენსეს“ დაუპირისპირდებიან და Leonino ვარაუდობს, რომ „ქოჩო“ ძირითად შემადგენლობას სწორედ ამ მატჩში დაუბრუნდება. „მარინენსე“ პორტუგალიის რანგით მეოთხე დივიზიონში მოთამაშე გუნდია.