„სტაბილური და მშვიდი“ - იტალიური მედია გოგლიჩიძის და ლორთქიფანიძის თამაშს აფასებს

გუშინ, სერია A-ს მე-7 ტურის დასკვნით მატჩში საბა გოგლიჩიძის „უდინეზე“ სტუმრად დაჩი ლორთქიფანიძის „კრემონეზეს“ დაუპირისპირდა და ფრედ, 1:1 ითამაშა.

გოგლიჩიძე სასტარტო შემადგენლობაში იყო და ბოლომდე შეუცვლელად ითამაშა. ქართველმა მცველმა 30-ე წუთზე ყვითელი ბარათი მიიღო, სხვა მხრივ კი უშეცდომო იყო და გაშვებულ გოლშიც ბრალეულობა არ მიუძღვის. რაც შეეხება დაჩი ლორთქიფანიძეს, ქართველი მცველი თამაშში 61-ე წუთიდან ჩაერთო და სერია A-ში დებიუტი ჰქონდა. დარჩენილ დროში, ახალგაზრდა ფეხბურთელი სტაბილური იყო.

შეხვედრის დასრულების შემდეგ იტალიურმა მედიამ ქართველი ფეხბურთელების თამაში შეაფასა.

დაჩი ლორთქიფანიძის შეფასება:

Eurosport.it – 6 ქულა: სერია A-ში სადებიუტო მატჩი ჰქონდა და ნახევარი საათი ითამაშა. სტაბილური იყო, ზედმეტი აღელვების გარეშე.

Tuttomercatoweb – 6 ქულა: მოედანზე შემოსვლის წუთიდან მატჩის რითმს კარგად მოერგო. ნახევარდაცვაში იბრძოდა და დაცვასაც ეხმარეობდა.

Calciomercato – 6 ქულა: მოედანზე ყოფნის 30 წუთში მან ყველა თანაგუნდელზე მეტი გააკეთა.

საბა გოგლიჩიძის შეფასება:

Eurosport.it – 6 ქულა: პირველ ტაიმში დაშვებული შეცდომა მის გუნდს თითქმის ძვირად დაუჯდა. თუმცა, ამის შემდეგ საკმაოდ ზუსტი იყო და საინტერესო ეპიზოდებიც ჰქონდა.

Calciomercato – 5.5 ქულა: ვარდისგან საკმაოდ დიდ ზეწოლას განიცდიდა და მოწინააღმდეგეები გასასვლელს ყოველთვის მისი პოზიციიდან პოულობდნენ.

Udinetoday – 5.5 ქულა: შემთხვევითი არ არის, რომ ყველაზე დიდი საფრთხეები მისი პოზიიდან მოდიოდა. ქართველისთვის საუკეთესო მატჩი არ ყოფილა, განსაკუთრებით პირველ ნახევარ საათში, რა დროსაც ყვითელი ბარათიც მიიღო.

Tuttoudinese – 5.5 ქულა: პირველ ტაიმში, აჩქარებების დროს ძალიან უჭირდა და მხოლოდ რიგ ეპიზოდებში იღებდა სწორ გადაწყვეტილებებს. მეორე ნახევარში თამაში გააუმჯობესა, მაგრამ საერთო ჯამში, მისთვის საკმაოდ რთული მატჩი გამოდგა.

Tuttomercatoweb – 5.5 ქულა: უდინეზეს დაცვას ხშირად უჭირდა, ისევე როგორც მას, განსაკუთრებით პირველ ტაიმში.

საბა გოგლიჩიძემ სერია A-ს მიმდინარე სეზონში „უდინეზეს“ მაისურით მე-4 შეხვედრა ჩაატარა და ზედიზედ მე-2 მატჩში სასტარტო შემადგენლობაში გამოჩნდა, დაჩი ლორთქიფანიძემ კი როგორც გითხარით, სერია A-ში „კრემონეზეს“ მაისური პირველად მოირგო.

7 ტურის შემდეგ „უდინეზე“ სატურნირო ცხრილში 9 ქულით მე-11 ადგილზე იმყოფება, „კრემონეზე“ კი 10 ქულით მე-10 პოზიციას იკავებს. გოგლიჩიძის გუნდი მომდევნო შეხვედრას 25 ოქტომბერს, საკუთარ მოედანზე „ლეჩეს“ წინააღმდეგ გამართავს, ლორთქიფანიძის გუნდი კი ასევე 25 ოქტომბერს, „ატალანტას“ უმასპინძლებს.