„ელ კლასიკოს ძველი ტრავმები გაიხსენა“ | ილიამ პიკე EA FC-ში გაანადგურა
ილია თოფურიამ სოციალურ ქსელებში საინტერესო ვიდეო გამოაქვეყნა. „ელ მატადორი“ „ბარსელონას“ ყოფილ ფეხბურთელს, ჟერარ პიკეს ცნობილ ვიდეოთამაშში, EA Sports FC 26-ში დაუპირისპირდა და მას შანსი არ დაუტოვა.
„ჟერარ პიკე ჩემს სახლში მოვიდა, რომ ელ კლასიკოს ძველი ტრავმები გაიხსენოს“, - დაწერა ილიამ, თუმცა მატჩი მისთვის არც თუ ისე კარგად დაიწყო. „ბარსელონათი“ მოთამაშე პიკე თოფურიას „რეალთან“ 3:2 დაწინაურდა და თქვა კიდეც, ამ თამაშს 6:2-ის სუნი ასდისო. მისდა სამწუხაროდ, ყველაფერი პირიქით მოხდა...
თოფურიამ ანგარიში გაათანაბრა და სამი გოლითაც დაწინაურდა - 6:3. „დაუჯერებელია. ყველა დარტყმა გოლია“, - აღნიშნა პიკემ, რის შემდეგაც „ელ მატადორმა“ მას გაახსენა, რომ ცოტა ხნის წინ 6 გოლის გატანაზე ლაპარაკობდა... ესპანელმა ფეხბურთელმა ჩამორჩენა შეამცირა, თუმცა საბოლოოდ, ილიამ 7:4 მოიგო.
View this post on Instagram
„შეხედე რა ნელია. რა სჭირს? დაცვაში არ ჩადის...“, - ამბობდა პიკე, რაზეც ილიამ ასე უპასუხა: „ეს ფეხბურთი არაა, ეს მაგიაა“.
