გოგას კარგი თამაში არ გამკვირვებია | ჯიკიჩი ბითაძის გამოსვლაზე

ევრობასკეტზე, მეორე ტურში საქართველოს კალათბურთელთა ნაკრები იტალიასთან 62:78 დამარცხდა. მატჩის შემდეგ საქართველოს ეროვნული ნაკრების მთავარმა მწვრთნელმა ალეკსანდარ ჯიკიჩმა პრესკონფერენციაზე ისაუბრა.

ჯიკიჩი: „ორი სრულიად განსხვავებული ტაიმი ვითამაშეთ. პირველ ტაიმში ჩვენს თამაშში ბალანსი იყო, ვცდილობდით იტალიის შეტევებს საპასუხო ნაბიჯებით დავხვედროდით, მაგრამ სამწუხაროდ, რამდენიმე რამ ჩვენს სასარგებლოდ არ წავიდა. დაბნეული ვარ, თუ როგორ ექცევიან ჩვენი გუნდის მოთამაშეებს, ჩვენი გუნდის კაპიტანს, თუმცა ეს ჩემი სალაპარაკო არაა. კარგი იქნებოდა, რომ მატჩის ოფიციალური მხარე უკეთესი ყოფილიყო (მსაჯობას გულისხმობს).

ვიცით რომ გვაქვს მიზანი, რა გვინდა და როგორ გვინდა წარმოვაჩინოთ თავი. საწყისი ორი თამაშიდან მხოლოდ ერთი მოვიგეთ, მაგრამ წინ მივდივართ. ბოლომდე მივდივართ, ყველაფერს ვდებთ თამაშში.“

ჯიკიჩი ბითაძეზე: „როგორც ყველამ იცით, მქონდა შესაძლებლობა გოგა ბითაძე გამეწვრთნა მანამდე, სანამ NBA-ში წავიდოდა. მას ბავშვობიდან ვაკვირდები, ვიცი მისი ძლიერი მხარეებიც და ისიც, რაში სჭირდება გაუმჯობესება. ძალიან გვეხმარება, კარგად ესმის თავისი როლი, მხარს უჭერს უფროსებს და ასწავლის ახალგაზრდებს. არ მიკვირს, რომ ასე კარგად თამაშობს''.

ჯიკიჩი საბერძნეთთან მატჩზე: „შემდეგი თამაში საბერძნეთთან გვაქვს. ზედიზედ გვიწევს თამაში, მაგრამ ეს პრობლემა არ არის. ვიცით აქ რატომ ვართ. ოქროსთვის არ ვიბრძვით, მაგრამ ზუსტად ვიცით, რა უნდა გავაკეთოთ. ჩვენ ვირჩევთ ჩვენს ბრძოლებს. ზოგ მოთამაშეს მეტს ვათამაშებთ, ვცდილობთ ტრავმებისგან დავიცვათ გუნდი. ამ ეტაპზე არავინაა დაშავებული. გადავწყვეტთ, ვინ ითამაშებს შემდეგ მატჩებში''.

ესპანეთის ძლევისა და იტალიასთან მარცხის შემდეგ საქართველოს ნაკრების მეტოქე საბერძნეთი იქნება. მატჩი ხვალ, 31 აგვისტოს 16:00 საათზე დაიწყება.