ამორიმი: ხან წასვლა მინდება, ხან 20 წლით დარჩენა

ინგლისის კარაბაოს თასის მეორე რაუნდში, „მანჩესტერ იუნაიტედი“ მეოთხე დივიზიონის, ლიგა ორის წარმომადგენელ „გრიმსბის“ დაუპირისპირდა და პენალტების სერიაში დამარცხდა.

„წითელი ეშმაკების“ მთავარმა მწვრთნელმა, რუბენ ამორიმმა თავისი რეაქცია ახსნა, როცა მან თამაშის შემდეგ ფეხბურთელები გააკრიტიკა.

40 წლის პორტუგალიელი სპეციალისტის თქმით, მას ხან გუნდიდან წასვლის სურვილი უჩნდება.

„ხანდახან ჩემს მოთამაშეებს ვერ ვიტან, ხან კი მიყვარს და მინდა ისინი დავიცვა. ეს ჩემი ქცევის სტილია. იმ მომენტში ძალიან გაღიზიანებული ვიყავი. ბევრი გამოცდილი ადამიანი მირჩევს, როგორ უნდა მოვიქცე მედიასთან და უფრო მშვიდი რომ ვიყო. მე ვიქნები ისეთი, როგორიც ვარ, რადგან სწორედ ასე ვეკიდები სამუშაოს. იმ წუთას ძალიან იმედგაცრუებული ვიყავი. ჩვენ კარგად ჩავატარეთ სეზონის წინა პერიოდი და უკეთესად ვთამაშობდით, მაგრამ ასეთმა თამაშმა იმედი გამიცრუა. ხან მინდება წავიდე, ხან კი დავრჩე 20 წელი“, - თქვა ამორიმმა.

შეგახსენებთ, რომ „მანჩესტერ იუნაიტედი“ ბოლოს ასეთ ადრეულ ეტაპზე სათასო დაპირისპირებას 2014 წელს გამოეთიშა, როდესაც „მილტონ კეინ დონსთან“ დამარცხდა.

გარდა ამისა, ეს არის „იუნაიტედის“ ანტირეკორდი და პირველი შემთხვევა, როცა „წითელმა ეშმაკებმა“ კარაბაოს თასზე (ყოფილ ლიგის თასზე) მეოთხე დივიზიონის წარმომადგენელთან წააგეს.