ლევანდოვსკი დროებით წავიდა | სკანდალი პოლონეთის ნაკრებში
პოლონეთის ნაკრები ერთ-ერთი ლიდერის, რობერტ ლევანდოვსკის გარეშე დარჩა. „ბარსელონას“ თავდამსხმელმა სოციალურ ქსელში პოსტი გამოაქვეყნა და განაცხადა, რომ ეროვნულ გუნდში მანამ არ დაბრუნდება, სანამ მისი მთავარი მწვრთნელი მიხალ პრობეჟი იქნება.
Biorąc pod uwagę okoliczności i utratę zaufania do selekcjonera Reprezentacji Polski postanowiłem do czasu kiedy jest trenerem zrezygnować z gry w Reprezentacji Polski. Mam nadzieję, że będzie dane mi jeszcze zagrać dla najlepszych kibiców na świecie. ????????
— Robert Lewandowski (@lewy_official) June 8, 2025
„შექმნილი სიტუაციიდან და იქიდან გამომდინარე, რომ პოლონეთის ნაკრების მთავარმა მწვრთნელმა ჩემდამი ნდობა დაკარგა, გადავწყვიტე, ეროვნული გუნდიდან იქამდე წავიდე, სანამ ის თავკაცი იქნება. იმედი მაქვს, რომ მსოფლიოს საუკეთესო გულშემატკივრების წინაშე თამაშს კიდევ შევძლებ“, - განაცხადა „ლევამ“.
პოლონეთის ნაკრებში მდგომარეობა მას შემდეგ დაიძაბა, რაც ლევანდოვსკის კაპიტნის სამკლავური ჩამოართვეს. მის ნაცვლად, გუნდის კაპიტანი პიოტრ ჟელინსკი გახდა და როგორც პოლონეთის ფეხბურთის ფედერაციის განცხადებაში აღინიშნა, მიღებული გადაწყვეტილების შესახებ, პრობეჟმა რობერტს პირადად შეატყობინა. ლევანდოვსკის ეს არ მოეწონა და ნაკრებიდან წასვლა გადაწყვიტა.
ცნობისთვის, პოლონეთმა 6 ივნისს ითამაშა და მოლდოვას ამხანაგური მატჩი 2:0 მოუგო. ლევანდოვსკის გუნდის მომდევნო მეტოქე ფინეთია, რომელსაც 10 ივნისს, მსოფლიო ჩემპიონატის საკვალიფიკაციო ეტაპის ფარგლებში დაუპირისპირდება.
