დამაჯერებელი გამარჯვება ორ სეტში | ბასილაშვილი როლან გაროსის ძირითად ბადეშია
ნიკოლოზ ბასილაშვილი როლან გაროსის ძირითად ბადეში გავიდა. საკვალიფიკაციო ეტაპის ფინალში, ბასილაშვილი მსოფლიო რეიტინგის 270-ე ნომერს, ჟოფრი ბლენკენოს დაუპირისპირდა და მეტოქე ორ სეტში დაამარცხა.
პირველი სეტი ბასილაშვილის უპირატესობით წარიმართა. 2:2-ზე, ნიკოლოზმა ბრეიკპოინტი შეასრულა, 4:2-ზე კი მეტოქის ჩაწოდება კიდევ ერთხელ მოიგო. „ბასილას“ საქმის ბოლომდე მიყვანა არ გასჭირვებია და პირველი პარტია 6:2 მოიგო.
მეორე სეტი იმავე სცენარით დაიწყო. 1:1-ზე, ბასილაშვილმა ბრეიკპოინტი გამოიყენა და მნიშვნელოვანი უპირატესობა მოიპოვა. 4:2-ზე, ნიკამ კიდევ ერთი ბრეიკი შეასრულა, თუმცა ბლენკენომ უკუბრეიკი შემოგვთავაზა. საბოლოოდ, 5:4-ზე ქართველმა ჩოგბურთელმა საკუთარი ჩაწოდება მოიგო და პარტიაში 6:4 იმარჯვა.
ცნობისთვის, როლან გაროსის ძირითადი ბადე 25 მაისს დაიწყება. ბლენკენომდე როლან გაროსის კორტებზე ქართველმა ჩოგბურთელმა პოლონელ ვაჩეროსა და ნიდერლანდელ ბროუვერს მოუგო.
